„ამჯერად 70%-ით უკეთესი ვიქნები“ - ომალი მერაბთან რემატჩზე
როგორც დენა ვაითმა გვაცნობა, 7 ივნისს, UFC 316-ზე მთავარი ბრძოლა მერაბ დვალიშვილისა და შონ ომალის მეორე დაპირისპირება იქნება. ქართველი „მანქანა“ ქამარს მეორედ დაიცავს, ომალი კი მის დაბრუნებას პირველად შეეცდება.
ომალიმ ბრძოლის ჩანიშვნის შემდეგ პირველი კომენტარი გააკეთა და აღნიშნა, რომ ამჯერად 70%-ით უკეთ იქნება მომზადებული.
„ბრძოლის წინა მოსამზადებელი ეტაპი ამჯერად წინა ბრძოლის სამზადისისგან ძალიან განსხვავებულია, ამჯერად თავს ძალიან კარგად ვგრძნობ.
მოუთმენლად ველი ოქტაგონზე გასვლას და საქმის კეთებას. ჩემი ცხოვრების წესებში ბევრი ცვლილებაა, რაც მეხმარება, რომ დიდებული ბრძოლა ვაჩვენო. ამჯერად 70%-ით უკეთესი ვიქნები. ვიქნები ბევრად უფრო სწრაფი და მოქნილი. ვაპირებ ჩემი სრული პოტენციალი გამოვავლინო“.
- ციტირებს ომალის სიტყვებს Bloody Elbow.
შეგახსენებთ, რომ დვალიშვილისა და ომალის პირველი ორთაბრძოლა 2024 წლის სექტემბერში გაიმართა. მერაბმა დომინანტური გამოსვლა აჩვენა და მსაჯების ერთსულოვანი გადაწყვეტილებით იმარჯვა.
