სეხუდოს თქმით, ის კარიერის დასრულებასთან ახლოსაა
სუპერმსუბუქი წონითი დივიზიონის ყოფილმა ჩემპიონმა, ჰენრი სეხუდომ განაცხადა, რომ კარიერას მალე დაასრულებს.
თებერვალში ამერიკელმა მებრძოლმა, სონგ იადონგთან ჩხუბის დროს, თვალი დაიზიანა - მას რბილი ქსოვილებისა და რქოვანას დაზიანება დაუდგინდა.
„არასდროს ვთვლიდი, რომ MMA რამით საშიში შეიძლება ყოფილიყო. ჩემს ცოლს ველაპარაკე და ვფიქრობ, ჩემი მომდევნო ჩხუბი შესაძლოა უკანასკნელი გახდეს. კიდევ ერთი ბრძოლა და მორჩა. თუ იადონგთან რევანშის ჩატარებას შევძლებ, მოხარული ვიქნები. თუ ჩემი მეტოქე ის არ იქნება, მზად ვარ ნებისმიერს ვეჩხუბო, ვისაც UFC შემომთავაზებს“, - თქვა სეხუდომ.
შეგახსენებთ, რომ მესამე რაუნდის მიწურულს იადონგის თითი სეხუდოს თვალში მოხვდა, რის გამოც შეხვედრა 5 წუთით შეწყდა, მაგრამ სეხუდომ ბრძოლის გაგრძელება მაინც ვერ შეძლო, ექიმების დახმარების მიუხედავად მარცხენა თვალიდან ვერ ხედავდა.
არბიტრმა ჯეისონ ჰერზოგმა ბრძოლა განაახლა, თუმცა მხოლოდ 1 წამით (მე-4 რაუნდი) და რადგან შეხვედრის ნახევარზე მეტი გასული იყო, შეხვედრა ტაიმ-აუტზე გააჩერა და დასრულებულად გამოაცხადა. გამარჯვებული მსაჯების მიერ იმ მომენტისთვის დაფიქსირებულმა შეფასებებმა გამოავლინა, იადონგმა გაიმარჯვა - 29-28, 29-28, 30-27.
