ოფიციალურად - პარატიჩი მილანის სპორტული დირექტორია
მიმდინარე წლის ზაფხულში, მილანში დიდი ცვლილებები იგეგმება. საუბარი ამ შემთხვევაში სატრანსფერო პერიოდზე გვაქვს, მაგრამ როსონერიმ პირველი ცვლილება დღეს განახორციელა.
დღეს ცნობილი გახდა, რომ მილანს ახალი სპორტული დირექტორი ფაბიო პარატიჩი ჰყავს, რომელსაც სერია ა-ში მუშაობის მრავალწლიანი გამოცდილება აქვს.
52 წლის სპეციალისტი სხვადასხვა დროს სამპდორიაში და იუვენტუსში მუშაობდა. ბებერ ქალბატონში მუშაობის დროს, გუნდმა სკუდეტო ზედიზედ 9-ჯერ მოიგო.
იტალიური მედიის ინფორმაციით, თითქმის გადაწყვეტილია, რომ თანამდებობას სერჟიუ კონსეისაუ დატოვებს. მისი შემცვლელის მთავარ კანდიდატად რობერტო დე ძერბი მოიაზრება.
ჯერჯერობით უცნობია, თუ რა ბედი ელის ზლატან იბრაჰიმოვიჩს. მასთან ხანგრძლივი მოლაპარაკება გაიმართება და მხოლოდ ამის შემდეგ გახდება ცნობილი, თუ რა როლი ექნება ლეგენდარულ შვედს მილანში.
შეგახსენებთ, რომ მიმდინარე სეზონში როსონერი საშინელ ფორმაშია. ჩემპიონთა ლიგას ნაადრევად დაამშვიდობა, ხოლო სერია ა-ში 30 ტურის შემდეგ, 47 ქულით მე-9 ადგილზეა და მეოთხე ადგილზე მყოფ ბოლონიას 9 ქულით ჩამორჩება.
