ანჩელოტიმ სასამართლოს ჩვენება მისცა - პროკურატურა 4.9-წლიან პატიმრობას ითხოვს
მადრიდის „რეალის“ მთავარმა მწვრთნელმა, კარლო ანჩელოტიმ ესპანეთის სასამართლოს საგადასახადო თაღლითობის საქმეზე ოფიციალური ჩვენება მისცა.
ესპანური მედიის ინფორმაციით, საქმეზე მადრიდის პროკურატურა კვლავ აქტიურ გამოძიებას აწარმოებს და იტალიელ სპეციალისტს ჯამურად 1 217 958 ევროს გადახდისგან თავის არიდებაში ადანაშაულებს.
პროკურატურის მტკიცებით, 2014-2015 წლებში კარლო ანჩელოტიმ დეკლარაციის შევსების დროს დოკუმენტში მხოლოდ მადრიდის რეალისგან მიღებული შემოსავალი ასახა, საიმიჯო უფლებებისგან მიღებული თანხა კი დეკლარაციაში არ შეიტანა.
მედიაში ანჩელოტის ჩვენების ამონარიდიც ვრცელდება: „როდესაც მადრიდის „რეალმა“ საიმიჯო უფლებები შემომთავაზა, ჩემს ინგლისელ კონსულტანტს დავუკავშირდი და შემდეგ, დეტალებში არ შევსულვარ, ყველაფერი კანონიერი ჩანდა. არ მეგონა თუ ეს თაღლითობად ჩაითვლებოდა, თუმცა დღეს ჩემი აქ ყოფნით ვფიქრობ, რომ ეს ყველაფერი არც თუ ისე სწორი იყო.
ჩემი მიზანი კლუბისგან 6 მილიონი ევროს კანონიერი გზით მიღება იყო და არ მქონია იმის შესახებ ინფორმაცია, რომ პროკურატურა ჩემზე გამოძიებას დაიწყებდა“.
ჩვენების მიცემის შემდეგ, როდესაც კარლო ანჩელოტი სასამართლო დარბაზს ტოვებდა, ჟურნალისტებს განუცხადა - „ყველაფერი კარგად არის“.
ცნობისთვის, მადრიდის პროკურატურის მიერ წაყენებული ბრალდება 4-დან 6-წლამდე ვადით თავისუფლების აღკვეთას ითვალისწინებს, პროკურორი კი ანჩელოტის შემთხვევაში 4 წლითა და 9 თვით პატიმრობას ითხოვს. თუმცა, ესპანეთის კანონმდებლობით შესაძლებელია, რომ ყველაფერი ფულადი ჯარიმის გადახდის შემდეგ მოგვარდეს, რომელიც რამდენიმე მილიონს უტოლდება.
