„ქაბაბის წყალობით წონა მარტივად მოვიმატე “ | ჩრდილოეთ ირლანდიელი მოკრივის ამბავი
მარტი კეისი ჩრდილოეთ ირლანდიელი მოკრივეა, რომლის შესახებაც ალბათ არაფერი გსმენიათ და ეს ლოგიკურიცაა. კეისს კარიერაში 28 ორთაბრძოლა აქვს გამართული და მის ანგარიშზე მხოლოდ და მხოლოდ 2 გამარჯვებაა, თუმცა, ერთი უცნაური რეკორდის ავტორია.
კეისმა სადებიუტო ჩხუბი 2000-იან წლებში, უმსუბუქეს წონით დივიზიონში ჩაატარა და სასწორზე 50 კილოგრამი დააფიქსირა. მისი სიმაღლე 166 სანტიმეტრია, მაგრამ ამას ჩრდილოეთ ირლანდიელისთვის ხელი არ შეუშლია, რომ მძიმე წონით დივიზიონში გადასულიყო. დიახ, სწორად წაიკითხეთ. მოკრივე, რომელმაც სადებიუტო ჩხუბი უმსუბუქეს წონაში გამართა, წლების შემდეგ, 14 წონითი კატეგორიით მაღლა ავიდა, ეს კი სარეკორდო მაჩვენებელია. ამდენით მაღლა, რა თქმა უნდა, პროფესიონალურ დონეზე, არასდროს არავინ ასულა.
2024 წლის ივლისში, კეისი მაიკ ჰედლის დაუპირისპირდა. ჩრდილოეთ ირლანდიელი 90 კილოგრამს იწონიდა და როგორღაც მოახერხა ის, რომ მეტოქეზე მძიმე ყოფილიყო. მარტი მსაჯების გადაწყვეტილებით დამარცხდა, მაგრამ რეკორდი მიითვალა და ჩხუბის შემდეგ, წონის მომატების პროცესზეც ილაპარაკა.
„უამრავ ნუტრიციოლოგთან გავიარე კონსულტაცია და ყველა მეუბნებოდა, რომ ეს შეუძლებელი იყო, თუმცა, ჩემს ქალაქში არსებული ქაბაბის მაღაზიების მესაკუთრეები სხვა აზრზე იყვნენ. მათი წყალობით, წონის მომატება საერთოდ არ გამჭირვებია“.
საინტერესოა, რომ თავდაპირველად, კეისს ჰედლისთან კრუზერვეითში უნდა ეჩხუბა, მაგრამ მაიკს წონის ჩაბარება გაუჭირდა და ჩრდილოეთ ირლანდიელს ჰკითხეს, მძიმე წონაში ხომ არ იასპარეზებდა, რაზეც თანხმობა განაცხადა.
