იოკიჩის 61-ქულიანი სამმაგი დუბლი | დენვერისა და მინესოტას საოცარი მატჩი

„დენვერ ნაგეთსმა“ და „მინესოტა ტიმბერვულვზმა“ კალათბურთის გულშემატკივრებს დაუვიწყარი სანახაობა აჩუქეს. მათი შეხვედრის ძირითადი დრო ფრედ დასრულდა და გამარჯვებულის გამოსავლენად ორი ოვერტაიმის დანიშვნა გახდა საჭირო.

საფინალო სირენამდე 13 წამით ადრე, „დენვერმა“ ნიკოლა იოკიჩის ჯარიმებით ანგარიში გაათანაბრა - 112:112. „მინესოტას“ გამარჯვება შეეძლო, მაგრამ ჯულიუს რენდლის სამქულიანი არაზუსტი აღმოჩნდა. პირველ ოვერტაიმში, 1 წუთით ადრე, „ტიმბერვულვზი“ 5 ქულით იგებდა, თუმცა, უპირატესობა ვერ შეინარჩუნა.

აარონ გორდონისა და ნიკოლა იოკიჩის ქულების წყალობით, ანგარიში კიდევ ერთხელ გათანაბრდა - 125:125. მეორე ოვერტაიმში, „ნაგეთსი“ გამარჯვებასთან ახლოს იყო, მაგრამ შეხვედრის დასრულებამდე 1 წამის მეათედით ადრე, რასელ უესტბრუკმა ჯარიმა აიღო, ნიკელ ალექსანდერ-უოკერმა კი ორივე სროლა გამოიყენა და „მინესოტამ“ 140:139 იმარჯვა.

„დენვერის“ რიგებში საუკეთესო იოკიჩი იყო, რომელმაც კარიერის ერთ-ერთი საუკეთესო მატჩი ჩაატარა - 61 ქულა (კარიერის საუკეთესო შედეგი, ყველაზე მეტი ქულა მიმდინარე სეზონში NBA-ის კალათბურთელისთვის), 10 მოხსნა, 10 შედეგიანი გადაცემა. „ჯოკერი“ პირველი ცენტრია, რომელმაც 60-ქულიანი სამმაგი დუბლი გააკეთა. ამასთან, იოკიჩი მესამე კალათბურთელია, რომელმაც 60-ქულიან ტრიპლ დაბლი გაიფორმა. მან ლუკა დონჩიჩისა და ჯეიმს ჰარდენის მიღწევა გაიმეორა, მაგრამ პირველია, ვინც ასეთი სტატისტიკის მიუხედავად, თამაში წააგო.

„ჯოკერის“ გარდა, 30 ქულით აარონ გორდონი გამოირჩა, კრისტიან ბრაუნს კი 18 ქულა ჰქონდა. „მინესოტას“ ენტონი ედვარდსმა ულიდერა - 34 ქულა, 10 მოხსნა, 8 ასისტი. რენდლსა და ალექსანდერ-უოკერს 26-26 ქულა ჰქონდათ, რუდი გობერს - 19.

ცნობისთვის, „დენვერს“ 27 მოგება და 29 წაგება აქვს და დასავლეთ კონფერენციაში მესამეა. „მინესოტას“ ანგარიშზე 44 გამარჯვება და 32 მარცხია.