„ყველაფერი სელტიკის წინადადებამ დააჩქარა“ | Superdeporte ქოჩორას ტრანსფერზე

ვალენსიური გამოცემა SuperDeporte „ლევანტედან“ „სპორტინგში“ გიორგი ქოჩორაშვილის ტრანსფერს ეხმიანება და აღნიშნავს, რომ ორ კლუბს შორის არსებული შეთანხმების მიხედვით, ტრანსფერის გაოფიციალურება ზაფხულში იგეგმებოდა, თუმცა ყველაფერი „სელტიკის“ წინადადებამ შეცვალა.

 

რას წერს გამოცემა:

 

„მას შემდეგ რაც იანვარში ანდრეს გარსიას „სპორტინგში“ ტრანსფერი ჩავარდა და ახალგაზრდა ესპანელი „ასტონ ვილაში“ გადავიდა, პორტუგალიურმა კლუბმა გადაწყვიტა, თავის დაზღვევის მიზნით „ბაყაყებთან“ ქოჩორასთან დაკავშირებით წინასწარი შეთანხმება გააფორმა.

ამ შეთანხმების მიხედვით, „ლომებში“ ქოჩორას ტრანსფერი ზაფხულში უნდა განხორციელებულიყო, თუმცა, იმ შემთხვევაში, თუ ქართველ ფეხბურთელთან დაკავშირებით ესპანური კლუბი სხვა შეთავაზებებსაც მიიღებდა, „სპორტინგი“ ვალდებული ხდებოდა, ტრანსფერი მაშინვე განეხორციელებინა და „ლევანტესთვის“ თანხა დაუყოვნებლივ გადაეხადა.

გასულ უქმეებზე „ლევანტეს“ ქართველ ფეხბურთელთან დაკავშირებით „სელტიკმა“ მიმართა, რამაც „სპორტინგში“ ტრანსფერი დააჩქარა“.

შეგახსენებთ, რომ ქოჩორაშვილი ზაფხულში ლისაბონის „სპორტინგს“ შეუერთდება. „ლომებმა“ ქართველ ფეხბურთელში 5,5 მილიონი ევრო გადაიხადეს, კიდევ 2 მილიონის მიღება „ლევანტეს“ ბონუსების სახით შეუძლია. ამასთან ერთად, თუ „სპორტინგმა“ სამომავლოდ ქოჩორაშვილის გაყიდვა გადაწყვიტა, „ლევანტე“ ტრანსფერიდან შემოსული თანხის 12.5%-ს მიიღებს.

„სპორტინგთან“ ქოჩორაშვილის კონტრაქტი 2030 წლამდეა გათვლილი, გამოსასყიდ თანხად კი 80 მილიონი ევრო განისაზღვრა.