„იმედია, კვარაცხელიას შემთხვევა აღარ გამეორდება“ - იტალიელი აგენტი ნაპოლიზე

ცნობილმა იტალიელმა საფეხბურთო აგენტმა, გაეტანო ფედელემ Radio Marte-ს ეთერში „ნაპოლის“ ამჟამინდელ მდგომარეობაზე ისაუბრა და იმ ფეხბურთელებს შეეხო, რომლებსაც უახლოეს პერიოდში კლუბთან კონტრაქტის გახანგრძლივება უწევთ.

ფედელეს მხედველობაში სტანისლავ ლობოტკა და ანდრე-ფრანკ ზამბო ანგისა მოხვდნენ. იტალიელი სპეციალისტი აღნიშნავს, რომ „ნაპოლიმ“ ამ ფეხბურთელებთან იგივე შეცდომა არ უნდა გაიმეოროს, რაც ხვიჩა კვარაცხელიასთან მიმართებით დაუშვა.

რას ამბობს ფედელე:

„იმედი მაქვს, ლობოტკასთან და ანგისასთან მიმართებით კვარაცხელიას შემთხვევა აღარ განმეორდება. მათ მალე კონტრაქტის განახლება უწევთ და მათი შენარჩუნება მნიშვნელოვანი იქნება. ამჟამად, ეს ორი ფეხბურთელი გუნდის ხერხემალია და მათი შენარჩუნებით კლუბი ახალი პროექტის უწყვეტობასაც შეინარჩუნებს“.

„ახლა მიმდინარე სეზონის მინი-ჩემპიონატი იწყება, სადაც შეცდომების დაშვების უფლება აღარ გვექნება. დღეს, ნაპოლის ყველაზე საშიში მტერი თავად ნაპოლი იქნება. ნერეშის ფაქტორი ძალიან მნიშვნელოვანი იქნება, რასპადორიმაც ბოლო თამაშებში 4 გოლი გაიტანა. შეტევით არეალში გუნდს ბევრი ვარიაცია აქვს და აუცილებელია საბოლოო ბირთვზე ჩამოყალიბება. კლუბში არის 14-15 მოთამაშე, რომელსაც სეზონის დასკვნით ფაზაში 100%-ით შეუძლია სარგებლის მოტანა“.

30 ტურის შემდეგ „ნაპოლი“ სერია A-ს სატურნირო ცხრილში 64 ქულით მე-2 პოზიციაზე იმყოფება და ლიდერ „ინტერს“ 3 ქულით ჩამორჩება. ანტონიო კონტეს გუნდი მომდევნო შეხვედრას 7 აპრილს, სტუმრად „ბოლონიასთან“ გამართავს.