სტეფ კარის შოუ მემფისთან | 12 სამქულიანი და 52-ქულიანი მასტერკლასი
„გოლდენ სტეიტ უორიორსის“ გამთამაშებელი, სტეფ კარი ისტორიის წერას განაგრძობს. გამთენიისას, „უორიორსი“ „მემფის გრიზლისს“ დაუპირისპირდა და „ოქროს ბიჭუნას“ საოცარი თამაშის წყალობით, 134:125 იმარჯვა.
კარიმ პარკეტზე 36 წუთი გაატარა და ფენომენალურად იასპარეზა. სტეფმა 52 ქულა, 10 მოხსნა, 8 შედეგიანი გადაცემა, 5 ჩაჭრა და 1 დაფარება გაიფორმა. „უორიორსის“ გამთამაშებელმა 20-დან 12 სამქულიანი ჩააგდო და NBA-ის ისტორიაში პირველი კალათბურთელია, რომელმაც მატჩი მინიმუმ 50 ქულით, 10 სამქულიანითა და 5 ჩაჭრით დაასრულა.
კარიმ 50-ქულიანი მატჩების რაოდენობით ლებრონ ჯეიმსს გადაუსწრო. სტეფს 15 ისეთი შეხვედრა აქვს, რომლებშიც სულ მცირე 50 ქულა დააგროვა. მის გარდა, ჯიმი ბატლერი გამოირჩა, რომელმაც 27 ქულა მიითვალა, დრეიმონდ გრინს კი სამმაგი დუბლი ჰქონდა - 13 ქულა, 10 მოხსნა, 12 ასისტი.
ცნობისთვის, „გოლდენ სტეიტს“ 44 მოგება და 31 წაგება აქვს და დასავლეთ კონფერენციაში მეხუთე გახლავთ. „უორიორსმა“ რეგულარული სეზონის დასრულებამდე, კიდევ 7 მატჩი უნდა გამართოს და მომდევნო შეხვედრა 4 აპრილს, „ლოს ანჯელეს ლეიკერსთან“ ელის.
