მამუკელაშვილი ბითაძის წინააღმდეგ | ორლანდომ სან ანტონიო დაამარცხა
NBA-ის რეგულარული სეზონის მორიგ სათამაშო დღეს, ქართული დერბი ვიხილეთ. გოგა ბითაძის „ორლანდო მეჯიქი“ ტექსასში ჩავიდა და სანდრო მამუკელაშვილის „სან ანტონიო სპურსი“ 116:105 დაამარცხა.
View this post on Instagram
ბითაძემ და მამუკელაშვილმა თამაში სათადარიგოთა სკამზე დაიწყეს. სანდრომ პარკეტზე 19 წუთი გაატარა და მის ანგარიშზე სამი ქულა იყო. „მამუმ“ „ორლანდოს“ ფარისკენ 6-ჯერ ისროლა და მხოლოდ ერთი სამქულიანი აღმოჩნდა ზუსტი.
ბითაძეს რაც შეეხება, გოგამ 11 წუთი მიიღო და აქტივში 2 ქულა, 6 მოხსნა, 1 დაფარება და 1 შედეგიანი გადაცემა ჩაიწერა. „ორლანდოს“ ქართველმა ცენტრმა 1 ორქულიანი ჩააგდო და 6-დან 1 მოხსნა მეტოქის ფარზე ჰქონდა.
„მეჯიქის“ რიგებში საუკეთესო ფრანც ვაგნერი და პაოლო ბანკერო იყვნენ - 24-24 ქულა. კენტავიუს კალდუელ-პოუპმა 23 ქულა დააგროვა. „სან ანტონიოს“ მხრიდან 24 ქულით ჰარისონ ბარნსი გამოირჩა. სტეფონ კასლს 16 ქულა, 8 მოხსნა და 7 შედეგიანი გადაცემა ჰქონდა.
ცნობისთვის, „ორლანდო“ აღმოსავლეთ კონფერენციაში მეშვიდე გახლავთ და მომდევნო შეხვედრა 4 აპრილს, „ვაშინგტონ უიზარდსის“ წინააღმდეგ ელის. მამუკელაშვილის „სან ანტონიო“ დასავლეთ კონფერენციაში მე-13 ადგილზეა და 3 აპრილს „დენვერ ნაგეთსს“ დაუპირისპირდება.
