რემატჩი შონ ომალისთან | მერაბ დვალიშვილი ქამარს ივნისში დაიცავს
UFC-ის ქართველი მებრძოლი, მერაბ დვალიშვილი სუპერ მსუბუქი წონითი დივიზიონის საჩემპიონო ქამარს 7 ივნისს (თბილისის დროით, 8 ივნისს) დაიცავს. UFC 316-ზე, „მანქანა“ შონ ომალის დაუპირისპირდება, რომლის დამარცხების შემდეგაც, ტიტულს დაეუფლა.
დვალიშვილისა და ომალის შეხვედრა ღონისძიების მთავარი მოვლენა იქნება და ეს ინფორმაცია UFC-ის აღმასრულებელმა დირექტორმა, დენა უაითმა თავად გაავრცელა. UFC 316 ნიუარკში გაიმართება და კიდევ ერთ საჩემპიონო ორთაბრძოლას ვიხილავთ - ჯულიანა პენა ქამრის დაცვას კაილა ჰერისონთან შეეცდება.
„UFC 316-ის მთავარ მოვლენაში, მოქმედი ჩემპიონი, მერაბ დვალიშვილი ყოფილ ჩემპიონს, შონ ომალის ხვდება. უმარ ნურმაგომედოვთან ნაჩვენები დომინანტური გამოსვლის შემდეგ, მერაბი შეეცდება, საჩემპიონო ქამარი მეორედ დაიცვას.
დვალიშვილს ზედიზედ 12 გამარჯვება აქვს და ყოფილი ჩემპიონები დაუმარცხებია, როგორებიც შონ ომალი, ჰენრი სეხუდო, პიოტრ იანი და ჟოზე ალდო არიან. ამასთან, მას UFC-ის სუპერ მსუბუქი წონითი დივიზიონის რეკორდი აქვს ზედიზედ მოგებული ჩხუბების, თეიქდაუნებისა და კონტროლის დროის რაოდენობით.
დვალიშვილის მეტოქე ყოველთვის აღმაფრთოვანებელ სტილში მოჩხუბარი ომალია. შონი უკვე UFC-ის სუპერ მსუბუქი წონითი დივიზიონის ყველა დროის ერთ-ერთი საუკეთესო სტრაიკერია და დარტყმების სიზუსტის მხრივ, უმაღლესი მაჩვენებელი აქვს. ომალიმ 12 ორთაბრძოლა ნოკაუტით მოიგო და UFC-ში მოგებული ბრძოლებიდან მხოლოდ ერთი იყო ისეთი, რომელშიც ბონუსი ვერ მიიღო“, - განაცხადა დენა უაითმა.
შეგახსენებთ, რომ დვალიშვილისა და ომალის პირველი ორთაბრძოლა 2024 წლის სექტემბერში გაიმართა. მერაბმა დომინანტური გამოსვლა აჩვენა და მსაჯების ერთსულოვანი გადაწყვეტილებით იმარჯვა.
