გოგიჩაშვილის ლელო - რასინგმა ბორდოს აჯობა
კიდევ ერთი ქართული ლელო საფრანგეთის სარაგბო ჩემპიონატის უმაღლეს ლიგაში - TOP 14-ის XX ტურში „რასინგმა“ საკუთარ სტადიონზე ჩემპიონობისთვის მებრძოლი „ბორდო“ 5-ქულიანი სხვაობით, 36:31 დაამარცხა, მასპინძლების წარმატებაში კი საკმაოდ დიდი როლი გურამ გოგიჩაშვილმა შეასრულა და წლევანდელ სეზონში მეტოქის ჩათვლის მოედანი პირველად აიღო.
შეხვედრაში ანგარიში სწორედ მასპინძლების ქართველი პირველი ნომრის აქტიურობის შედეგად გაიხსნა - მე-3 წუთზე გოგიჩაშვილი რთულ ვითარებაში კარგად გაერკვა და ეფექტური ლელო დადო. საქართველოს ნაკრების 26 წლის მორაგბემ მიმდინარე სეზონში ოციდან ცხრამეტ შეხვედრაში მიიღო მონაწილეობა, აქედან 12 სასტარტოში დაიწყო და მოედანზე საერთო ჯამში 798 წუთი გაატარა.
20 ტურში დაგროვებული 39 ქულით „რასინგი“ საფრანგეთის სარაგბო ჩემპიონატის უმაღლესი ლიგის სატურნირო ცხრილში მე-11 ადგილზეა. მომდევნო შეხვედრას გოგიჩაშვილი და მისი თანაგუნდელები ევროპის ჩელენჯ თასზე, სტუმრად „პერპირიანთან“ 5 აპრილს გამართავენ.
