ბითაძემ 21 წუთი ითამაშა და 2 ქულა ჩააგდო | ორლანდომ ჰორნეთსს სტუმრად მოუგო

გოგა ბითაძის „ორლანდო მეჯიქმა“ ზედიზედ მესამე გამარჯვება იზეიმა. „ლოს ანჯელეს ლეიკერსისა“ და „ვაშინგტონ უიზარდსის“ შემდეგ, „მეჯიქმა“ „შარლოთ ჰორნეთსს“ მოუგო და აღმოსავლეთ კონფერენციის აუტსაიდერი სტუმრად 111:104 დაამარცხა.

ბითაძემ პარკეტზე 21 წუთი და 43 წამი გაატარა. გოგამ 2 ქულა, 9 მოხსნა და 2 შედეგიანი გადაცემა დააგროვა. ქართველმა ცენტრმა 2-დან 1 ორქულიანი ჩააგდო, 1 სამიანი გააფუჭა და 9-დან 3 მოხსნა მეტოქის ფარზე ჰქონდა. გოგას პასივში 1 დაკარგვა და 4 პერსონალური ჯარიმა იყო.

„ორლანდოს“ 32 ქულით პაოლო ბანკერომ ულიდერა. ფრანც ვაგნერს 26 ქულა ჰქონდა, ხოლო ენტონი ბლეკმა 20 ქულა დააგროვა. „ჰორნეთსის“ რიგებში საუკეთესო ლამელო ბოლი იყო, რომელმაც 25 ქულა და 9 შედეგიანი გადაცემა გააკეთა. ჯოშ გრინსა და ნიკ სმიტ ჯუნიორს 13-13 ქულა ჰქონდათ.

შეგახსენებთ, რომ „ორლანდო“ აღმოსავლეთ კონფერენციის მერვე ადგილს იკავებს და 35 მოგება და 38 წაგება აქვს. „მეჯიქი“ მომდევნო შეხვედრას 28 მარტს, „დალას მავერიქსის“ წინააღმდეგ გამართავს.