კვალიფიკაცია მოიგო - ბასილაშვილი ფინიქსის ჩელენჯერზე ითამაშებს

ფინიქსის ჩელენჯერის საკვალიფიკაციო ეტაპის ფინალში ნიკოლოზ ბასილაშვილი ტარო დანიელს დაუპირისპირდა და მარტივად, ორ სეტში 6:4 6:1 დაამარცხა. ქართველი ჩოგბურთელი ჩელენჯერის ძირითად ბადეში იასპარეზებს.

პირველ სეტში ჩოგბურთელები საკუთარ ჩაწოდებაზე დამაჯერებლად თამაშობდნენ, თუმცა მეათე გეიმში, იმ დროს, როდესაც ბასილაშვილი 5:4-ს იგებდა, ბრეიკი შეასრულა და სეტი დახურა.

მეორე სეტი ნიკოლოზისთვის შედარებით მარტივი გამოდგა. ბრეიკი იმ დროს შეასრულა, როდესაც 2:1-ს იგებდა, წინ გავიდა და შემდეგ საკუთარი ჩაწოდებაც მოიგო. 4:1-დან იაპონელს მატჩში დაბრუნება გაუჭირდა. მეტიც, შემდეგი გათამაშება კვლავ წააგო და ქართველმა ჩოგბურთელმა მატჩზე ჩააწოდა. საბოლოოდ 6:1.

აღნიშნულ დაპირისპირებაში ბასილაშვილმა 11 ეისი შეასრულა. 2 ორმაგი შეცდომა დაუშვა, პირველი ჩაწოდების სიზუსტე 81% ჰქონდა, ხოლო 3 ბრეიკ პოინტიდან სამივე გამოიყენა.

ცნობისთვის, ფინიქსის ჩელენჯერი 2019 წლიდან ყოველწლიურად არიზონის შტატში ტარდება. მისი მოქმედი გამარჯვებული ნუნო ბორგესია, რომელმაც შარშან ფინალში მატეო ბერეტინი დაამარცხა.