„ყველაფერი ძალიან მალე გაირკვევა...“ | ქეცბაია მაზერუელის გაწვრთნაზე

საქართველოს ნაკრების ყოფილმა მთავარმა მწვრთნელმა შოტლანდიურ „მაზერუელში“ შესაძლო დანიშვნაზე პირველი კომენტარი გააკეთა. ამის შესახებ კვიპროსულ მედიაზე დაყრდნობით Scottish Sun-ი იტყობინება.

56 წლის სპეციალისტის თქმით, ძალიან მალე გახდება ცნობილი, იმუშავებს თუ არა ის „მაზერუელში“.

„ვნახოთ, რა მოხდება. კვიპროსის ნაკრებიდან წასვლის შემდეგ შეთავაზებები საქართველოდან და საბერძნეთიდან მქონდა, მაგრამ უარი ვთქვი.

ევროპის წამყვან ლიგებში მუშაობის გამოცდილება არ მაქვს, მიუხედავად იმისა, რომ, ვფიქრობ, კვიპროსში ჩემი მიღწევებით ეს დავიმსახურე. სხვა ქვეყნებში კვიპროსულ ფეხბურთზე არასწორი წარმოდგენა აქვთ და გარკვეული როლი ამანაც ითამაშა.

გარდა ამისა, როდესაც მწვრთნელობაზეა საუბარი, მნიშვნელობა აქვს იმასაც, რომელი ქვეყნის პასპორტი გაქვს. ესპანელებისა და პორტუგალიელების მიმართ სულ სხვა მიდგომაა. ესპანელი რომ ვყოფილიყავი, დიდ გუნდში ვიმუშავებდი“.

შეგახსენებთ, რომ ბოლოს ქეცბაია კვიპროსის ეროვნულ ნაკრებს წვრთნიდა, სადაც 2022 წლიდან მუშაობდა და 2024 წლის სექტემბერში თანამდებობა დატოვა.

აქვე გეტყვით, რომ „მაზერუელს“ ბოლო 10 მატჩში მხოლოდ ერთი მოგება აქვს, კლუბი შოტლანდიის ჩემპიონატის სატურნირო ცხრილის მე-6 ადგილზეა. შოტლანდიური მედიის ინფორმაციით, კლუბის ხელმძღვანელობამ მთავარი მწვრთნელის თანამდებობაზე ორი კანდიდატურა შეარჩია, რომელთაგან ერთი სწორედ თემურ ქეცბაიაა.