როდის იგეგმება გახანგრძლივება - იამალის კონტრაქტის დეტალები

მიმდინარე სეზონის მსვლელობისას, „ბარსელონამ“ კონტრაქტი რამდენიმე წამყვან ფეხბურთელთან გაახანგრძლივა. პედრისა და პაბლო გავის შემდეგ, როგორც კატალონიური სპორტული გამოცემები იუწყებიან, რიგში ინიგო მარტინესი დგას, რის გამოც გაჩნდა ლოგიკური შეკითხვა, რატომ არ აწარმოებს კლუბის ხელმძღვანელობა ანალოგიური სახის მოლაპარაკებებს ახალგაზრდა ლიდერ ლამინ იამალთან, რომელსაც „ბლაუგრანასთან“ ხელშეკრულება 2026 წლის ზაფხულში უსრულდება.

როგორც აღმოჩნდა, მხარეები ამ საკითხთან დაკავშირებით რამდენჯერმე შეხვდნენ ერთმანეთს და პრინციპული შეთანხმებაც მიღწეულია. გადაწყვეტილია, რომ იამალი კლუბთან ახალ კონტრაქტს 13 ივლისის, ანუ მას შემდეგ გააფორმებს, როდესაც 18 წელი შეუსრულდება და სრულწლოვანი გახდება. ახალი ხელშეკრულების მიხედვით, იამალის წლიური ხელფასი 8 მილიონი ევრო იქნება, რის შემდეგაც ის რობერტ ლევანდოვსკისა და ფრენკი დე იონგის შემდეგ „ბარსას“ რიგით მესამე ყველაზე მაღალანაზღაურებად ფეხბურთელად იქცევა.

შეგახსენებთ, რომ 17 წლის ლამინის ანგარიშზე მიმდინარე სეზონში ყველა ტურნირზე გამართულ 28 შეხვედრაში 10 გოლთან ერთად, 12 საგოლე გადაცემაა.