მათე ყავლაშვილი ევროლიგის ADIDAS NEXT GENERATION-ის ცნობილ ტურნირში სათამაშოდ მიიწვიეს
ADIDAS NEXT GENERATION – ეს გახლავთ ახალგაზრდული (U18) ტურნირი, რომელიც ევროლიგის ეგიდით ტარდება და რომელშიც კონტინენტის ყველაზე პერსპექტიული კალათბურთელები ასპარეზობენ. ტურნირში უშუალოდ ცნობილი კლუბების ასაკობრივ გუნდებთან ერთად სპეციალურად ამ ტურნირისთვის დაკომპლექტებული გუნდებიც მონაწილეობენ, სადაც ორგანიზატორები პერსპექტიულ ახალგაზრდებს იწვევენ. სწორედ ასე მიიწვიეს ქალაქ ულმის NEXT GEN-ის გუნდში მათე ყავლაშვილი, რომელიც 16 წლისაა და საკუთარ ასაკში ხომ გამორჩეულია, საქართველოს ეროვნულ ნაკრებშიც სისტემატურად იძახებენ.
მათე ყავლაშვილი ზაზა ფაჩულიას აკადემიის აღზრდილია და მის ყველა ასაკობრივ გუნდში უთამაშია – დაწყებული ჯუნიორ ნბა-ს (U12) გუნდიდან, ასევე 14, 16, 18 და 20-წლამდელებშიც კი. ყავლაშვილი მიმდინარე სეზონიდან სუპერლიგის ერთ-ერთ წამყვან კლუბ თსუ-ში ასპარეზობს და არცთუ იშვიათად მოედანზე გასვლის და უფროსებში თავის გამოჩენის საშუალება ეძლევა.
მიმდინარე სეზონში ADIDAS NEXT GENERATION-ის ტურნირი 3 ლოკაციაზე იმართება. ტურნირები უკვე ჩატარდა გერმანიის ქალაქ მიუნხენში და თურქეთის მეგაპოლის სტამბოლში. თურქეთში გამარჯვება სერბულმა “მეგა ბიმაქსმა” მოიპოვა, რომელშიც თავის დროზე ამ ტურნირზე გოგა ბითაძეს უთამაშია და წაგებულ ფინალურ მატჩში 21 ქულა და 17 მოხსნა მიითვალა. აქვე აღვნიშნოთ, რომ ADIDAS NEXT GENERATION-ის ტურნირზე ნათამაშები აქვს სანდრო მამუკელაშვილს, ლუკა ალავიძეს და ათუკა ბახტაძეს. ბახტაძე ყავლაშვილზე 1 წლით უფროსია, რომლებიც კიდევ ერთ ყოჩაღ ბიჭთან – მათე ხატიაშვილთან ერთად ქართული კალათბურთის ყველაზე პერსპექტიულ ტრიოდ ითვლება.
ADIDAS NEXT GENERATION-ის მიმდინარე სეზონის მესამე და დასკვნითი ტურნირი 7-10 თებერვალს გერმანულ ქალაქ ულმში გაიმართება. მათე ყავლაშვილი ულმის NEXT GEN-ის ნაკრებში იასპარეზებს, რომელიც პირველ საკვალიფიკაციო მატჩში 7 თებერვალს, ბერძნულ ოლიმპიაკოსს დაუპირისპირდება. ულმში მონაწილე სხვა გუნდები იქნებიან: ალბა და რატიოფარმა (ორივე გერმანია), ესპანური ბარსელონა, ლიეტუვური ჟალგირისი, ფრანგული ვილერბანი და არაბთა გაერთიანებული საამიროების დუბაის გუნდი. ულმი 8 თებერვალს ორ მატჩს გამართავს, შუადღეს ალბას დაუპირისპირდება, ხოლო საღამოს – ბარსელონას.
წყარო: GBF.ge
