გოგლიჩიძე და იუვენტუსი | რა გეგმები აქვს კრისტიანო ჯუნტოლის

საბა გოგლიჩიძის ტურინის „იუვენტუსში“ შესაძლო ტრანსფერი კვლავინდებურად აქტუალური თემაა. „ბებერმა ქალბატონმა“ დაცვა გააძლიერა, მაგრამ კიდევ ერთი უკანახაზელის დამატებას აპირებს და ცნობილმა სატრანსფერო ექსპერტმა, ჯანლუკა დი მარციომ „ბიანკონერის“ გეგმებზე ილაპარაკა.

დი მარციოს მიხედვით, „ემპოლისა“ და „იუვენტუსს“ შორის კონტაქტი შედგა და მოლაპარაკებები დაწყებულია, თუმცა, ტურინელები არ ჩქარობენ. „იუვეს“ სპორტული დირექტორის, კრისტიანო ჯუნტოლის ყურადღება ჟან-კლერ ტოდიბოსა და დავიდ ჰანცკოსკენაა მიპყრობილი. ჯუნტოლი მათთან მოვლენების განვითარებას ელოდება და „ემპოლის“ კონკრეტულ შეთავაზებას მხოლოდ ამის შემდეგ გაუკეთებს. გასათვალისწინებელია ისიც, რომ ტოსკანურ კლუბს, რომელიც სერია A-ში ადგილის შესანარჩუნებლად იბრძვის, საბას ზამთარში დაკარგვა არ სურს.

„იუვენტუსი“ ერთადერთი იტალიური კლუბი არაა, რომლის რადარზეც ქართველი მცველი იმყოფება. რამდენიმე ცნობილი გამოცემის მიხედვით, გოგლიჩიძის გადაბირებაზე „მილანიც“ ფიქრობს, მაგრამ ამ ეტაპზე, „ბებერი ქალბატონი“ „როსონერიზე“ წინაა.

ცნობისთვის, გოგლიჩიძეს „ემპოლისთან“ კონტრაქტი 2027 წლის ზაფხულამდე აკავშირებს და Transfermarkt-ზე მისი ღირებულება 8 მილიონი ევროა. გოგლიჩიძეს მიმდინარე სეზონში მონაწილეობა 19 შეხვედრაში აქვს მიღებული და მოედანზე 1497 წუთი გაატარა.