დუ პლესი: მახაჩევთან ბრძოლა ჩემთვის იოლი ფულია

UFC-ის საშუალო წონის ჩემპიონმა, დრიკუს დუ პლესმა ისლამ მახაჩევთან პოტენციურ ჩხუბზე კიდევ ერთხელ ილაპარაკა.

სამხრეთ აფრიკელი მებრძოლი დარწმუნებულია, რომ დაღესტნელ მეტოქეს მარტივად დაამარცხებს, რადგან ის გაცილებით ძლიერია.

„მისი ბრძოლა და გრეპლინგი ფენომენალურია, მაგრამ მე უბრალოდ მასზე ფიზიკურად ძლიერი ვიქნები - ამას უდიდესი მნიშვნელობა აქვს. ნებისმიერ შემთხვევაში მოვერევი. თუ შეიქმნება ისეთი სიტუცია, როცა არავინ დარჩება, ვისაც ვეჩხუბებით, ამ ბრძოლას აზრი ექნება და მე მას სიამოვნებით ჩავატარებ - ეს ჩემთვის იოლი ფულია“, - თქვა დუ პლესმა.

შეგახსენებთ, რომ რენატო მოიკანოს დამარცხების შემდეგ, მახაჩევმა UFC-ს დირექტორს, დენა უაითს მიმართა და აღნიშნა, რომ თუ ის შესთავაზებს, მზად იქნება სატიტულო ბრძოლა სხვა წონითი დივიზიონის ჩემპიონთან გამართოს და პირდაპირ დრიკუს დუ პლესი გამოიწვია.

დუ პლესი მორიგ ჩხუბს შონ სტრიკლენდთან გამართავს. რევანში 8 თებერვალს, ავსტრალიაში, UFC 312-ზე გაიმართება.

მათი პირველი ჩხუბი გასული წლის იანვრის ბოლოს, UFC 297-ზე შედგა და დუ პლესმა სტრიკლენდი 5 რაუნდის შემდეგ, არბიტრების გაყოფილი გადაწყვეტილებით დაამარცხა.