NBA-ს ექსპერტი: „40 წლის ლებრონი 36 წლის კარიზე უკეთესია“

ნაციონალურ საკალათბურთო ასოციაციაში „გოლდენ სტეიტისა“ და „ლეიკერსის“ თამაშს ამ გუნდების ლეგენდარული კალათბურთელების, სტეფ კარისა და ლებრონ ჯეიმსის ფაქტორიდან გამომდინარე, მუდამ დიდი ყურადღება ექცევა. გამონაკლისი არც დღეს გამართული მატჩი ყოფილა, რომელიც ჯეიმსმა და კომპანიამ 10-ქულიანი სხვაობით, 118:108 მოიგეს, რის შემდეგაც NBA-ს ცნობილმა ექსპერტმა საინტერესო მოსაზრება ჩამოაყალიბა.

სკიპ ბეილესი

ღმერთო ჩემო, როგორი არასტანდარტული თამაში გამოვიდა სტეფ კარისთვის, რომელიც „ლეიკერსთან“ მატჩებს მუდამ მაღალ დონეზე ატარებს და ლოს-ანჯელესელების წინააღმდეგ ყოველთვის განსაკუთრებულად ინდომებს. მისი ჩვიდმეტი სროლიდან ზუსტი მხოლოდ ოთხი რომ აღმოჩნდება და დიდი შესვენების შემდეგ ერთ ქულასაც ვერ დააგროვებს, საქმე საგანგაშოდ არის. არ ვიცი ვინ რას ფიქრობთ, მაგრამ ჩემი აზრით, 40 წლის ლებრონი უკეთესია, ვიდრე 36 წლის სტეფი.

მართალია ორმაგ დუბლამდე მხოლოდ ერთი პასი დააკლდა, მაგრამ კარის მისი რეალური შესაძლებლობების გათვალისწინებით, მართლაც საშინელი მატჩი ჰქონდა და 32 წუთში მხოლოდ 13 ქულა, 9 ასისტი, 2 ჩაჭრა და 1 მოხსნა დააგროვა. რაც შეეხება ლებრონს, მან სტეფისგან განსხვავებით, ორმაგი დუბლი დააფიქსირა და თამაში 25 ქულით, 12 ასისტით, 5 მოხსნითა და 1 ჩაჭრით დაასრულა.