“ერთ დღეს აუცილებლად მოიგებ დიდ სლემს“ - სინერმა ზვერევს მიმართა

ავსტრალიის ღია პირველობის ფინალში იანიკ სინერმა ალექსანდრ ზვერევი 3 სეტში 6:3 7:6 6:3 დაამარცხა.

მატჩის დასრულების შემდეგ, იტალიელმა ჩოგბურთელმა კომენტარი გააკეთა.

რა თქვა სინერმა?

„საშა, შენ საოცარი მოთამაშე ხარ. გჯეროდეს საკუთარი თავის. ჩვენ ყველამ ვიცით, რამდენად ძლიერი ხარ არა მხოლოდ, როგორც ჩოგბურთელი, არამედ პიროვნებაც. ასე გააგრძელე. გვჯერა, რომ დიდ სლემს აუცილებლად მოიგებ.

რა შემიძლია ვთქვა ჩემს გუნდზე.. ძალიან ბევრი ვიმუშავეთ, რომ აქამდე მოვსულიყავით. გასაოცარია ამის მიღწევა, მაგრამ ყველაზე ემოციური ამ სიხარულის თქვენთვის გაზიარებაა. დარენ ვიცი, რომ ეს შეიძლება შენთვის ბოლო ავსტრალიის ღია პირველობაა და ეს გამარჯვება ახლა უფრო ბედნიერს მხდის.

ეს დიდებული ტურნირია. მადლობა ორგანიზატორებს, თქვენ ყველაფერს თავი დიდებულად გაართვით.“

შეგახსენებთ, რომ იანიკ სინერმა ავსტრალიის ღია პირველობა ზედიზედ მეორედ მოიგო. კარიერაში კი სამი დიდი სლემის ტურნირი დაუგროვდა. გასულ წელს, იტალიელმა ამერიკის ღია პირველობაც მოიგო.

ცნობისთვის, ამ მომენტისთვის იანიკი ATP რეიტინგს 11830 ქულით დამაჯერებლად ლიდერობს. მეორე პოზიციაზე კი 8135 ქულით ალექსანდრ ზვერევია.