პსჟ მისი გუნდია - სიომინი ხვიჩას დებიუტზე

ხვიჩა კვარაცხელიამ გუშინ „პარი სენ-ჟერმენის“ შემადგენლობაში პირველი მატჩი ჩაატარა და მოედანი შედეგიანი მოქმედების გარეშე არ დაუტოვებია - 47-ე წუთზე უსმან დემბელემ მიმდინარე ლიგა 1-ში თავისი მე-11 გოლი სწორედ 23 წლის ქართველი შემტევის მიერ განხორციელებული დიდებული სოლო რეიდის შედეგად გაიტანა. კვარას დებიუტზე საკუთარი მოსაზრება ბევრმა ადამიანმა გამოთქვა და მათ შორის იყო მისი ყოფილი მწვრთნელი იური სიომინი, რომელიც ხვიჩას მოსკოვის „ლოკომოტივში“ ავარჯიშებდა.

რა თქვა კვარაცხელიაზე

პარიზულ გრანდში სადებიუტო მატჩი არაჩვეულებრივად ჩაატარა. ჰქონდა ბრწყინვალე საგოლე მოქმედება, როდესაც დემბელეს გაატანინა. გარდა ამისა, თანაგუნდელებთან კედელის გათამაშების შემდეგ, მეტოქის კარს ხშირად ემუქრებოდა. ვფიქრობ პსჟ მისი გუნდია, რადგან ის კომბინაციური ფეხბურთი, რასაც „სენ-ჟერმენს“ ლუის ენრიკე ათამაშებს, ხვიჩას სტილს ზედმიწევნით მიესადაგება.

შეგახსენებთ, რომ სიომინი თავის დროზე მოსკოვის „ლოკომოტივიდან“ კვარაცხელიას „რუბინში“ გადასვლის კატეგორიული წინააღმდეგი იყო, თუმცა მისი აზრი არ გაითვალისწინეს და ტრანსფერი შედგა. ხვიჩამ კი ყაზანურ გუნდში პირველი თამაში სწორედ „რკინიგზელების“ წინააღმდეგ ჩაატარა და გოლის გატანით ყოფილი კლუბის შეფებს დაუმტკიცა, რომ მისი გაშვება უდიდესი შეცდომა იყო.