“ნებისმიერ პოზიციაზე შემიძლია თამაში“ - კვარას ვრცელი ინტერვიუ

საფრანგეთის ლიგა 1-ში მორიგი ქართული ისტორია დაიწყო. პარი სენ ჟერმენში ხვიჩა კვარაცხელიას დებიუტი შედგა.

ქართველი ფეხბურთელი რეიმსის წინააღმდეგ ძირითად შემადგენლობაში მოგვევლინა და თავი საგოლე პასით დაგვამახსოვრა. კვარამ უსმან დემბელეს გაატანინა, თუმცა ეს საკმარისი არ აღმოჩნდა და მატჩი ფრედ 1:1 დასრულდა.

მატჩის დასრულების შემდეგ, ქართველი ფეხბურთელის ვრცელი ინტერვიუ ფრანგულმა გამოცემა L’equipe-მ შემოგვთავაზა.

ხვიჩა:

„პარკ დე პრენსზე პირველი მატჩი წარმოუდგენელი გრძნობა იყო. საოცარი ატმოსფერო სუფევდა. ძალიან ბედნიერი ვარ, რომ აქ ვარ ამ გუნდთან, ამ გულშემატკივრებთან და ამ წარმოუდგენლად მაგარ ფეხბურთელებთან ერთად. მოედანზე კარგი გრძნობა მქონდა. რთული მატჩი იყო. შევქმენით მომენტები, რომლებიც უნდა გაგვეტანა. სამწუხაროდ, ბევრი შანსი გავუშვით ხელიდან.

საგოლე გადაცემით ბედნიერი და ამაყი ვარ. ცოტა იმედგაცრუებული დავრჩი, რადგან დღეს უნდა მოგვეგო, აქ ჩემი დებიუტი იყო, მაგრამ უფრო მეტს ვიმუშავებთ და ყველაფერი გამოსწორდება. ფიზიკურად თავს კარგად ვგრძნობ, ერთი თვეა არ მითამაშია. ვფიქრობ, ამის გამო ცოტა გამიჭირდა, მაგრამ მწვრთნელების დახმარებით მეტს ვმუშაობ და ტოპ ფორმაში დავბრუნდები.

შეტევაში ნებისმიერ პოზიციაზე შემიძლია თამაში. ძალიან სასიამოვნოა, როცა თავს თავისუფლად გრძნობ, როცა მიზანთან ახლოს ხარ. გუნდს მკაფიო სტრატეგია აქვს. პარიზში შესანიშნავი პირველი კვირა გავატარე. ჩემზე ძალიან ზრუნავენ. ბედნიერი ვარ, რომ აქ ვარ, ეს ჩემთვის მნიშვნელოვანია. მინდა, რომ პსჟ ჩემპიონთა ლიგის შემდეგ ეტაპზე გავიდეს. მანჩესტერ სიტისთან მხურვალედ ვგულშემატკივრობდი. გამარჯვება დავიმსახურეთ. რთული მატჩი იყო, მაგრამ შესანიშნავი ხარისხი ვაჩვენეთ.

შტუტგარტი? ჩემპიონთა ლიგაზე ადვილი თამაშები არ არსებობს. ყველაფრისთვის მზად ვართ. ნებას თუ მომცემენ გუნდს გერმანიაში აუცილებლად გავყვები. მიხარია ის ფაქტიც, რომ ჩემი მეგობრებიც საფრანგეთში არიან. ზურიკოსთან და გიორგისთან ძალიან ახლოს ვარ. ახლა კი მოწინააღმდეგეები ვართ. როდესაც ეროვნულ ნაკრებში შევხვდებით, შეიძლება ცოტა ვიკამათოთ(იღიმის).

შეგახსენებთ, რომ ხვიჩას ტრანსფერი პარიზელებს 75 მილიონი ევრო დაუჯდათ. ქართველი სუპერვარსკვლავი პსჟ-ს ისტორიაში რიგით მე-4 ყველაზე ძვირადღირებული ტრანსფერია.

ცნობისთვის, ლუის ენრიკეს გუნდი საფრანგეთის ლიგა ერთს 47 ქულით დამაჯერებლად ლიდერობს. შემდეგ ტურში პსჟ ბრესტს ესტუმრება. აღნიშნული დაპირისპირება პირველი თებერვლით თარიღდება და თბილისის დროით 20:00-დან დაიწყება. 

კვარას მომენტები VS რეიმსი