ვინც კლუბთან მოლაპარაკებებში არ ჩაერთვება, გუნდთან ვარჯიშიც აეკრძალება
„ბარსელონას“ პრეზიდენტმა ჟოან ლაპორტამ გუნდში ფეხბურთელების მიმართ მკაცრი ზომების მიღება გადაწყვიტა. საქმე ეხება მოთამაშეებს, რომელთა კონტრაქტიც იწურება და მათ თავისუფალი აგენტის სტატუსის მიღება უწევთ.
ასეთი ფეხბურთელები, რომლებიც ხელშეკრულების გახანგრძლივებაზე უარს იტყვიან, სეზონის დარჩენილ ნაწილს სკამზე გაატარებენ. ინფორმაციას ესპანური Sport-ი ავრცელებს.
უფრო კონკრეტულად, ლაპორტა საუბრობს ფეხბურთელებზე, რომელთა კონტრაქტი 2025 წლის ივნისში სრულდება, ასევე მათზე, რომელთა ხელშეკრულებები 2026 წლის ივნისამდეა ძალაში. სეზონი და სეზონნახევარი - კონტრაქტებში ამ ვადების მქონე მოთამაშეებს იანვარში და ივლისი-აგვისტოში კლუბთან შეთანხმების დადება მოუწევთ, წინააღმდეგ შემთხვევაში მათ ძირითად გუნდთან ერთად ვარჯიშის საშუალებაც კი არ მიეცემათ.
ამ მხრივ ყველაზე პრობლემატური ფეხბურთელი ფრენკი დე იონგია, რომლის კონტრაქტიც 2026 წლის ზაფხულში იწურება. ნიდერლანდელი ნახევარმცველი კლუბს ახალ ხელშეკრულებაზე არ ესაუბრება. ლაპორტას კი ეს მდგომარეობა აღიზიანებს. დე იონგს ყველაზე მზარდი ანაზღაურება აქვს და „ბლაუგრანას“ ფინანსური ფეარ პლეის მხრივ პრობლემებს უქმნის.
კლუბში თვლიან, რომ დე იონგი არ არის იმ კალიბრის მოთამაშე, რომელსაც ასეთი კონტრაქტი უნდა ჰქონდეს. გარდა ამისა, „ბარსა“ ამჟამად არც ისეთ სიტუაციაშია, რომ ზოგადად ნებისმიერ ფეხბურთელთან მსგავსი პირობები შეათანხმოს. როგორც მოგეხსენებათ, ნიდერლანდელთან ასეთი ხელშეკრულება კლუბის წინა პრეზიდენტმა ბართომეუმ გააფორმა.
