პსჟ-ს ბრწყინვალე გამარჯვება სიტისთან - ხვიჩას ლიგაზე თამაშის შანსები იზრდება

ჩემპიონთა ლიგის ფაზის მე-7 ტურში პსჟ-მ „მანჩესტერ სიტის“ უმასპინძლა და დღის მთავარმა შეხვედრამ მოლოდინები სრულად გაამართლა. ლუის ენრიკეს გუნდმა ბრწყინვალე ფეხბურთი ითამაშა და 4:2 მოიგო.

„პარკ დე პრენსის“ ტრიბუნებზე მყოფმა ხვიჩა კვარაცხელიამ მშრალი პირველი ტაიმის შემდეგ 6-გოლიანი მეორე ნახევარი იხილა. 50-ე და 53-ე წუთებზე გრილიშმა და ჰოლანდმა „სიტი“ წინ ორი ბურთით გაიყვანა და თითქოს პარიზელები გამოუვალ მდგომარეობაში ჩავარდნენ.

56-ე და მე-60 წუთებზე უსმან დემბელესა და ბრედლი ბარკოლას გოლებით პარიზელებმა გუარდიოლას გუნდი დაშალა და ამის შემდეგ მოედანზე მხოლოდ ერთი გუნდი თამაშობდა ფეხბურთს.

ჟოაუ ნევეშმა 78-ე წუთზე ძალიან ლოგიკური გოლი გაიტანა და პსჟ დააწინაურა. შეხვედრას წერტილი 96-ე წუთზე გონსალუ რამუშმა დაუსვა და „მანჩესტერ სიტი“ 25-ე ადგილზე გადაისროლა.

რაც შეეხება კვარაცხელიას გუნდს, პსჟ 10 ქულით 22-ე ადგილზეა და ბოლო ტურში სტუმრად „შტუტგარტთან“ ერთი ქულის აღებაც ფლეი-ინში მოხვედრის გარანტიას მისცემს, სადაც უკვე თამაშის უფლება კვარაცხელიასაც ექნება.

„შტუტგარტისა“ და პსჟ-ს მატჩი 29 იანვარს (23:55) გაიმართება.