„ძალიან გვაკლია, ფანტასტიკური კალათბურთელია“ | ორლანდოს ცენტრი გოგას აქებს

„ორლანდო მეჯიქის“ ცენტრმა, უენდელ კარტერ ჯუნიორმა გოგა ბითაძეზე ისაუბრა. ქართველი კალათბურთელი გუნდს ტრავმის გამო ვერ ეხმარება და „მეჯიქმა“ მის გარეშე მორიგი შეხვედრა წააგო. ამჯერად, „ორლანდო“ „დენვერ ნაგეთსთან“ დამარცხდა და მატჩი 100:113 დათმო.

„გოგა უნიკალურია და მიმდინარე სეზონში, თამაშობს კალათბურთელივით, რომელსაც მისია აქვს შესასრულებელი. ბითაძე ფანტასტიკურია როგორც სამწამიანის დაცვის, ისე შეტევების დაგვირგვინებისა და მოხსნების განხორციელების კუთხით. როცა დაცვაში პრობლემები გვაქვს, ის ყოველთვის ჩვენ გვერდითაა.

გოგა უნიკალურია და ნამდვილად გვაკლია. მისი ინტენსიურობა, დეტალებისადმი ყურადღება და პარკეტზე ყოფნა ძალიან გვაკლია. ბითაძე ფანტასტიკური კალათბურთელია. ის არის ბიჭი, რომელსაც თანაგუნდელად ისურვებდი. მოთამაშე რომელიც ყოველთვის მზადაა, შავი სამუშაო შეასრულოს“.

ცნობისთვის, ბითაძემ ტრავმა 13 იანვარს, „ფილადელფია სევენთი სიქსერსთან“ გამართულ შეხვედრაში მიიღო. გოგამ თეძო დაიზიანა და პარკეტის დატოვება მოუწია. „ორლანდოს“ მთავარი მწვრთნელის, ჯამალ მოზლის მიხედვით, ქართველი კალათბურთელის სარეაბილიტაციო პროცესი ნელ ტემპში პროგრესირებს.