გოგლიჩიძის ახალი მსურველი | მილანს და იუვეს კონკურენტი გამოუჩნდა

Empoli Channel-ის ინფორმაციით, საბა გოგლიჩიძეს ახალი მსურველი გამოუჩნდა, ეს კლუბია ბერგამოს „ატალანტა’’.

„ატალანტას’’ ცენტრალურმა მცველმა ოდილონ კოსუნუმ მძიმე ტრავმა მიიღო (4-5 თვეს გამოტოვებს) და ბერგამოული კლუბი მისი შემცვლელის ძიებაშია.

„ატალანტას'' მთავარი მწვრთნელი გამოცდილი სპეციალისტი ჯან პიერო გასპერინია, გუნდი ჩემპიონთა ლიგაზე თამაშობს, თუმცა ბოლო პერიოდში არასტაბილურად გამოდის, სერია A-ში 4-მატჩიანი მოუგებელი სერია აქვს.

შეგახსენებთ, გოგლიჩიძით „მილანი’’ და „იუვენტუსი’’ ინტერესდებიან. Empoli Channel-ის ცნობით, ტურინული კლუბი ცენტრალური მცველის პოზიციაზე ჰელას „ვერონას’’ 21 წლის მოთამაშეს, დიეგო კოპოლასაც განიხილავს.

CrystalSport-ის ინფორმაციით, სავარაუდოდ 25 იანვრამდე საბას ტრანსფერის საკითხი არ გაირკვევა, გოგლიჩიძის მომავალი მიმდინარე თვის ბოლო კვირაში გადაწყდება.

საბა გოგლიჩიძეს წარმატებული სეზონი აქვს. ტრანსფერმარკტის მონაცემებით, ზაფხულში მისი სატრანსფერო თანხა 400 000 ევრო იყო, ახლა კი 8 მილიონი ევროა. სერია A-ს მიმდინარე სეზონში 18 მატჩი ჩაატარა, ძალიან კარგ შთაბეჭდილებას ტოვებს და გამორჩეული იტალიური კლუბების ყურადღება მიიპყრო.