სულშერი ბეშიქთაშის მთავარი მწვრთნელი გახდა

ოლე გუნარ სულშერმა „ბეშიქთაში“ ჩაიბარა. ინფორმაციას თავად თურქული კლუბი ავრცელებს.

ცნობილი ჟურნალისტისა და ინსაიდერის, ფაბრიციო რომანოს ინფორმაციით, ნორვეგიელი სპეციალისტის კონტრაქტი 2026 წლამდეა გათვლილი.

სულშერი სტამბულში იმყოფებოდა, სადაც კლუბის ხელმძღვანელობას შეხვდა და ასევე მედიასთან მოკლე კომენტარი გააკეთა.

„აქ ყოფნა ძალიან სასიამოვნოა. ძალიან მაგარია, რომ ამ არაჩვეულებრივ კლუბში ამდენი ადამიანი შეიკრიბა. ჩვენ პირველი შეხვედრა გავმართეთ და მოუთმენლად ველოდები მუშაობის დაწყებას“, - თქვა სულშერმა.

თურქეთის ჩემპიონატის 18 ტურის შემდეგ, „ბეშიქთაში“ მე-6 ადგილზეა და ლიდერ „გალათასარაის“ 20 ქულით ჩამორჩება.

რაც შეეხება სულშერს, 2021 წელს, „მანჩესტერ იუნაიტედიდან“ წასვლის შემდეგ, არსად არ უმუშავია.