„უნივერსალურობა, ფიზიკური სიძლიერე და პროგრესის ადგილი“ | რას წერს PianetaMilan-ი საბაზე

Pianetamilan-მა საბა გოგლიჩიძეს საინტერესო სტატია მიუძღვნა. „ემპოლის“ ქართველ ფეხბურთელს „მილანს“ აქტიურად უკავშირებენ და Pianetamilan-მა საკუთარ მკითხველს ახალგაზრდა მცველი ახლოდან გააცნო.

„მილანი მომავალზე ფიქრობს და ერთ-ერთი ფეხბურთელი, ვინც როსონერის დაუკავშირეს, საბა გოგლიჩიძეა - ემპოლის ახალგაზრდა მცველი, რომელიც შესაძლოა, იანვარში, როსონერის მთავარი სამიზნე გახდეს.

2004 წლის 25 ივნისს დაბადებული გოგლიჩიძე მრავალმხრივი ცენტრალური მცველია, რომელსაც შეუძლია, მარჯვენა უკანახაზელის პოზიციაზეც იასპარეზოს. 194 სანტიმეტრი სიმაღლის მქონე ქართველი თავისი ფიზიკურობითა და მეორე სართულზე თამაშის უნარით გამოირჩევა. გოგლიჩიძე ქუთაისის ტორპედოს აღზრდილია და ემპოლიმ მის სანაცვლოდ 450 000 ევრო გადაიხადა, რის შემდეგაც, მისი სატრანსფერო ღირებულება 8 მილიონამდე გაიზარდა.

მიმდინარე სეზონში, გოგლიჩიძე ემპოლის დაცვის ხაზის ერთ-ერთი ბურჯია და სერია A-ში გამართულ 17 შეხვედრაში, მინდორზე 1383 წუთი გაატარა. ინტერთან მიღებული წითელი ბარათის მიუხედავად, მაღალ დონეზე ასპარეზობს. რა თქმა უნდა, მისი ასაკის გათვალისწინებით. Sofascore-ის მიხედვით, გოგლიჩიძემ ორთაბრძოლების 63 პროცენტი მოიგო და 80-პროცენტიანი პასების სიზუსტე აქვს, რომელიც საკუთარ ნახევარზე შესრულებული გადაცემებთან მიმართებით, 88 პროცენტამდე იზრდება. შეტევების წამოწყების კუთხით, საბას მოსამატებელი აქვს, რადგან მისი გრძელი პასების მხოლოდ 40 პროცენტია ზუსტი. თუმცა, ქართველმა ფეხბურთელმა, დაცვით ფაზაში, უკვე სოლიდური უნარები აჩვენა.

გოგლიჩიძის ხარისხი შეუმჩნეველი არ დარჩენილა და მილანი მზადაა მისთვის ბრძოლაში ჩაერთოს. საბა არის ტალანტი, რომელიც მომავლისთვის შესაძლოა, მნიშვნელოვანი ინვესტიცია გახდეს. ფიზიკური სიძლიერის, მრავალმხრივობისა და პროგრესის ადგილის გათვალისწინებით, ემპოლის მცველი სერჟიუ კონსეისაუს პროექტში ჩართვის ერთ-ერთი კანდიდატია“, - წერს მილანური გამოცემა.

შეგახსენებთ, რომ „ემპოლი“ გოგლიჩიძის გასხვისების წინააღმდეგი არაა, მაგრამ სურს, იგი სეზონის ბოლომდე დაიტოვოს და ზაფხულში გაუშვას.