„ახალგაზრდა მცველს დაიმატებენ“ | გოგლიჩიძე იუვენტუსის სამიზნეთა შორის
ლუკა მარკეტი ცნობილი იტალიელი ჟურნალისტი და სატრანსფერო ექსპერტია, რომელიც Sky Sport Italia-სთვის მუშაობს. მარკეტიმ „იუვენტუსის“ გეგმებზე ილაპარაკა და დაადასტურა, რომ „ბებერი ქალბატონის“ სამიზნეთა შორის საბა გოგლიჩიძეცაა.
„რონალდ არაუხოს ტრანსფერი კვლავინდებურად რთულია, რადგან ბარსელონას მისი გასხვისება არ სურს, თავად ფეხბურთელს კი საბოლოო გადაწყვეტილება ჯერ არ მიუღია. იუვენტუსი არ ნებდება და მტკიცე უარი თუ არ მიიღო, ბოლომდე იბრძოლებს.
არაუხოსთან წარუმატებლობის შემთხვევაში, იუვენტუსი ტომორის, ჰანცკოსა და დანსოს ვარიანტებს დაუბრუნდება. კლუბი მოიყვანს ორ ცენტრალურ მცველს და ერთ-ერთი მათგანი ახალგაზრდა იქნება. ფეხბურთელი, რომლის სახელიც აქტუალურია, საბა გოგლიჩიძე გახლავთ“.
შეგახსენებთ, რომ გოგლიჩიძე „ემპოლის“ ღირსებას იცავს და Transfermarkt-ზე მისი ღირებულება 8 მილიონ ევრომდე გაიზარდა. იტალიური კლუბი მზადაა, ქართველი ფეხბურთელი გაყიდოს, მაგრამ მისი ერთ-ერთი მოთხოვნა, გოგლიჩიძის სეზონის ბოლომდე გუნდში დატოვებაა. „იუვენტუსის“ გარდა, საბას გადაბირებაზე „მილანიც“ ფიქრობს.
