ვინისიუსი იმედგაცრუებულია - რეალთან დაძაბულობა იზრდება

მადრიდის „რეალსა“ და ვინისიუსს შორის ურთიერთობა დაიძაბა. ამის შესახებ მადრიდული As-ი წერს.

საქმე „ელ კლასიკოს“ ეხება. ესპანეთის სუპერ თასის ფინალში, „ბლანკოსმა“ „ბარსელონასთან“ 2:5 წააგო, ანჩელოტიმ ვინისიუსი მოედნიდან 75-ე წუთზე გაიყვანა. ბევრი ელოდა, რომ როდრიგო შეიცვლებოდა, თუმცა ასე არ მოხდა.

წყაროს ცნობით, ამ ფაქტით ვინისიუსი და მისი გარემოცვა უკმაყოფილო დარჩა. As-ი წერს, რომ „რეალის“ ხელმძღვანელობამ ეს იცის.

ვინისიუსი ხედავს, რომ იგი გუნდში ხელშეუხებელი მოთამაშე აღარ არის და არსებული რეალობით ის უკმაყოფილოა. ბოლო დროს კილიან მბაპე დიდებულ ფორმაში შევიდა და მოედანზე ბრაზილიელს აშკარად ჩრდილავს.

ასევე ცნობილია, რომ საუდის არაბეთიდან ვინისიუსს ასტრონომიული შეთავაზება აქვს, რამაც შესაძლოა ის სეზონის ბოლოს კიდევ ერთხელ დააფიქროს.

ესპანური პრესა ადრე წერდა, რომ ესპანეთში ვინისიუსის ცუდი იმიჯი „სამეფო კლუბს“ მის გაყიდვაზე ფიქრს აიძულებს. გარდა ამისა ბრაზილიელიც და მბაპეც ძირითადად ერთ სივრცეში თამაშობენ. სამომავლოდ კი კლუბს არჩევანის გაკეთება მოუწევს.