საბატინი: კვარას გაყიდვა გონივრული გადაწყვეტილებაა

ცნობილმა იტალიელმა სპორტულმა მენეჯერმა, ვალტერ საბატინიმ რადიო Marte-ს ეთერში სტუმრობისას ხვიჩა კვარაცხელიაზე ილაპარაკა და მისი „პარი სენ-ჟერმენში“ გადასვლა შეაფასა.

მან კვარას გაყიდვას გონივრული და მიზანშეწონილი გადაწყვეტილება უწოდა.

რა თქვა საბატინიმ:

„მნიშვნელოვანი შემოთავაზების პირობებში, კლუბს არ შეუძლია უარი თქვას ასეთ მომგებიან გარიგებაზე. განსაკუთრებით იმ კლუბებს, რომლებიც დამოუკიდებლები არიან და კაპიტალის გაზრდის მექანიზმებს ვერ იყენებენ. დე ლაურენტისი უკვე 20 წელია კლუბის ფინანსებს სტაბილურად განაგებს, თან ისე, რომ სპორტულ კონკურენტუნარიანობას არ კარგავს და ამ გზის გაგრძელება საჭიროა“.

„სამწუხაროა კვარასთან დამშვიდობება. ის ძლიერი მოთამაშეა, თუმცა მისი გაყიდვა უდავო გადაწყვეტილებაა. ამ გარიგებიდან მინიმუმ 40-50% ახალი ტრანსფერებისთვის დაიხარჯება, რადგან ქართველი ფეხბურთელის გაყიდვის შემდეგ, „ნაპოლი“ სკუდეტოსთვის ბრძოლაში კონკურენტუნარიანობას დაკარგავს. ბევრი რამ დამოკიდებულია იმაზე, თუ ვინ შეცვლის კვარას. თან იმის გათვალისწინებით, რომ „ნაპოლის“ თავის შემადგენლობაში უკვე ჰყავს მნიშვნელოვანი მოთამაშეები“.

„არ მინდა ვისაუბრო კვარას შესაძლო შემცვლელებზე, რომლებზეც მედიაში იწერება. შემიძლია ვთქვა, რომ გარნაჩო ძლიერია, თუმცა არასტაბილური, მკვეთრი პოზიციების გარეშე. კიეზას შეუძლია კარგად ითამაშოს - ის დიდებული მოთამაშეა, სწრაფი, ფიზიკურად ამტანი და თავდასხმის არაჩვეულებრივ უნარებს ფლობს“.

შეგახსენებთ, რომ პსჟ-ში ხვიჩა კვარაცხელიას ტრანსფერი ოფიციალურად მიმდინარე კვირის ბოლომდე გაოფიციალურდება.

მანამდე, გავლენიანმა ექსპერტმა ფაბრიციო რომანომ დაწერა, რომ მხარეებმა შეთანხმებას ყველა დეტალზე მიაღწიეს და ქართველი შემტევის პარიზულ გუნდში თამაში 100%-ით გადაწყვეტილია.

გავრცელებული ინფორმაციით, პსჟ-ს „ნაპოლის“ 70 მილიონ ევროს გადაუხდის, ხვიჩას კი 5-წლიან კონტრაქტს გაუფორმებს. ასევე, ვრცელდება ინფორმაცია, რომ კვარა ანაზღაურების სახით წლიურად 9 მილიონ ევროს მიიღებს. რომანო წერს, რომ პსჟ-ში უკვე დაინიშნა ხვიჩა კვარაცხელიას სამედიცინო შემოწმება და ეს მიმდინარე კვირის ბოლომდე მოხდება.