„რაც ახლა არის, ეს მხოლოდ ნაპოლის დამსახურებაა“ - ნაპოლის ყოფილი მცველი ხვიჩაზე

„ფიორენტინას“, „ნაპოლისა“ და „ემპოლის“ ყოფილმა ფეხბურთელმა, ვიტორიო ტოსტომ რადიო Kiss Kiss Napoli-ის ეთერში ხვიჩა კვარაცხელიას პსჟ-ში ტრანსფერზე ისაუბრა და განაცხადა, რომ ქართველი შემტევი კლუბის მისამართით არასწორად მოიქცა.

რას ამბობს ტოსტო:

„კვარამ „ნაპოლიდან“ წასვლით შეცდომა დაუშვა. ის აქ მეოთხე დონის ქვეყნიდან მოვიდა და მხოლოდ „ნაპოლის“ მაისურის წყალობით გახდა ის, ვინც ახლა არის. მას გუნდის მიმართ უფრო მეტი მადლიერება უნდა გამოეხატა. თუ წასვლა უნდოდა, ივნისში უნდა წასულიყო და არა იანვარში. ახლა, ეს ამბავი „ნაპოლის“ ძალიან დააზარალებს“.

პსჟ-ში ხვიჩა კვარაცხელიას ტრანსფერი ოფიციალურად მიმდინარე კვირის ბოლომდე გაოფიციალურდება. მანამდე, გავლენიანმა ექსპერტმა ფაბრიციო რომანომ დაწერა, რომ მხარეებმა შეთანხმებას ყველა დეტალზე მიაღწიეს და ქართველი შემტევის პარიზულ გუნდში თამაში 100%-ით გადაწყვეტილია.

გავრცელებული ინფორმაციით, პსჟ-ს „ნაპოლის“ 70 მილიონ ევროს გადაუხდის, ხვიჩას კი 5-წლიან კონტრაქტს გაუფორმებს. ასევე, ვრცელდება ინფორმაცია, რომ კვარა ანაზღაურების სახით წლიურად 9 მილიონ ევროს მიიღებს.

რომანო წერს, რომ პსჟ-ში უკვე დაინიშნა ხვიჩა კვარაცხელიას სამედიცინო შემოწმება და ეს მიმდინარე კვირის ბოლომდე მოხდება.