„ნაპოლი ჩემპიონს კარგავს...“ - კასანომ კვარას ტრანსფერზე ისაუბრა

ვეტერანმა იტალიელმა ფეხბურთელმა, ანტონიო კასანომ Viva el Futbol-თან საუბრისას ხვიჩა კვარაცხელიას პსჟ-ში ტრანსფერზე თავისი მოსაზრება დააფიქსირა.

რა თქვა კასანომ:

„ანტონიო კონტესი კარგად მესმის. მის ბოლო განცხადებაში გულწრფელობა დავინახე. მას კარგად ვიცნობ და როგორც ყოველთვის, ამჯერადაც მართალი იყო. ის იმას საუბრობს, რასაც ფიქრობს და ხვიჩას წასვლაში დამნაშავე არ არის“.

„რაც შეეხება დე ლაურენტისს, ის იგუაინის, კავანის, ოსიმენისა და სხვა ფეხბურთელების შემთხვევაში ყოველთვის ერთი და იგივე თამაშს თამაშობდა. ამჯერად კი ჭკვიანურად მოიქცა და საქმე არ გაართულა, როგორც ეს ოსიმენის შემთხვევაში გააკეთა. დე ლაურენტისი 75-მილიონიან შეთავაზებას დათანხმდა და კატასტროფას თავი ააცილა. მაგრამ მეორეა, რომ გუნდი კარგავს ნამდვილ ჩემპიონს, რომელსაც ფენომენალური პოტენციალი აქვს, ის სიგიჟემდე მომწონს. მისი თამაშით ყოველთვის აღფრთოვანებული ვიყავი მაშინაც კი, თუ კონტესთან ერთად არ იყო. ის ყოველთვის ბევრს მუშაობდა“.

„კვარა ყველაზე კარგად სპალეტის ფეხბურთს შეეფერებოდა. ერთის მხრივ, კონტე კვარას დაკარგვით უკმაყოფილოა, მაგრამ მეორე თვალსაზრისით, მას დავიდ ნერეში ჰყავს, რომელიც ბოლო მატჩებში მოედანზე ერთ-ერთი საუკეთესოა. სამწუხაროდ, ჩვენი ჩემპიონატი სულ უფრო პრაგმატული ხდება... ახლა უნდა წავიდე და პსჟ-ს თამაშებს უნდა ვუყურო, რადგან იქ ისეთი ფეხბურთელი ითამაშებს, რომელიც სიგიჟემდე მომწონს“.

პსჟ-მა და „ნაპოლიმ“ ხვიჩა კვარაცხელიას ტრანსფერის საკითხზე შეთანხმებას მიაღწიეს. გუშინ, პარიზული გუნდის წარმომადგენლები საფრანგეთის ქალაქ ნიცაში „ნაპოლის“ ხელმძღვანელებს შეხვდნენ და ტრანსფერის ძირითად დეტალებზე შეთანხმდნენ.

გავლენიანი ფრანგული გამოცემა Lequipe-ს ინფორმაციით, იურიდიული შეთანხმების გასაფორმებლად კიდევ რამდენიმე დეტალის გავლა მოუწევთ, რომელიც უახლოეს დღეებში საბოლოოდ გადაწყდება. ამასთან, ხვიჩას „ნაპოლისგან“ პსჟ-ში სამედიცინო შემოწმების გავლაზე ნებართვა ჯერ არ მიუღია, თუმცა ეს მხოლოდ დროის საკითხი იქნება.

Lequipe წერს, რომ დღის განმავლობაში, ხვიჩას აგენტი მამუკა ჯუღელი პსჟ-ს საფეხბურთო მრჩეველს ლუის კამპოსს შეხვდება და მხარეები საბოლოო დეტალებს შეათანხმებენ.

საგულისხმოა, რომ გუშინ, ყველა გავლენიანმა სატრანსფერო ექსპერტმა დაწერა, რომ პსჟ და „ნაპოლი“ საბოლოო შეთანხმებასთან ახლოს არიან და შესაბამისად, კვარა პარიზში გადასვლასთან ერთ ნაბიჯშია.