„მისი პსჟ-ში გადასვლა ბევრ პრობლემას გამოასწორებს“ - Foot Mercato კვარაზე წერს
Foot Mercato „ნაპოლის“ ქართველი ფეხბურთელის, ხვიჩა კვარაცხელიას „პარი სენ-ჟერმენში“ ტრანსფერზე წერს, რომელიც მედიის ცნობით, უკვე შედგა და მალე მის შესახებ ოფიციალურად გამოცხადდება.
„არის თუ არა კვარა იდეალური ვარიანტი პსჟ-სთვის?“ - ფრანგული გამოცემა სტატიას ამ სათაურით აქვეყნებს და წერს:
„დავიწყოთ იმით, რომ პარიზელების შემტევი ხაზი გადატვირთული ჩანს. თუ შევხედავთ ლუის ენრიკეს მიერ წარმოდგენილ გუნდს, პსჟ-ს უკვე ჰყავს თავის რიგებში რამდენიმე ძლიერი „იარაღი“ - უსმან დემბელე, გონსალო რამოსი, ბრედლი ბარკოლა და დეზირე დუე. თუმცა ამის მიუხედავად, რეალობა სხვანაირია. ჩემპიონთა ლიგის შემდეგ რამდენიმე პრობლემამ იჩინა თავი და სიმართლე ისაა, რომ პსჟ-ს ძალიან სჭირდება გამოცდილი ტალანტი შემტევ ხაზში. ხვიჩა კვარაცხელიას მოსვლა კი, რომელიც სერია A-ში ბოლო 2 წელია საუკეთესო მოთამაშეა, გამოასწორებს ბევრ პრობლემას, რომელიც სეზონის პირველ ნახევარში გაჩნდა. ამ სიტუაციაში ისეთ მოთამაშეზე უარის თქმა, როგორიც კვარაცხელიაა, სიგიჟე იქნებოდა“.
„ქართველი ფეხბურთელი ფლობს უნიკალურ თვისებებს, რომელიც პარიზულ გუნდს ძალიან სჭირდება. კვარაცხელია კრეატიული მოთამაშეა, რომელსაც შეუძლია როგორც საგოლე მომენტები შექმნას, ასევე თავად გაიტანოს. გარდა ამისა, მას მაღალი ტექნიკური უნარები აქვს - შეუძლია ითამაშოს როგორც მარცხენა ფლანგზე, ისე ცენტრსა და მარჯვენა ფლანგზეც. მას შეუძლია მარცხენა ფრონტზე ლიდერი გახდეს. კვარას ლიდერული თვისებები განსაკუთრებით მკაფიოდ გამოჩნდა გასულ სეზონზე“.
„კვარაცხელია ნამდვილად არაჩვეულებრივი ფეხბურთელია და ის შემთხვევით არ უყვართ „ნაპოლის“ ფანებს, თუმცა ქართველი ვინგერი დიდად არ შეესაბამება იმ მოთხოვნილებებს, რაც პსჟ-ს ახლა აქვს. გუნდს უფრო მეტად მარჯვენა ვინგერი ან ცენტრალური თავდამსხმელი სჭირდებოდა. რა თქმა უნდა, კვარას შეუძლია ცენტრშიც ითამაშოს და მარჯვენა ფლანგზეც, მაგრამ ღირს კი 80 მილიონს გადახდა ფეხბურთელზე, რომელსაც არ დააყენებ მის საყვარელ ფლანგზე - კერძოდ, კი მარცხნივ?“.
პსჟ-მა და „ნაპოლიმ“ ხვიჩა კვარაცხელიას ტრანსფერის საკითხზე შეთანხმებას მიაღწიეს. გუშინ, პარიზული გუნდის წარმომადგენლები საფრანგეთის ქალაქ ნიცაში „ნაპოლის“ ხელმძღვანელებს შეხვდნენ და ტრანსფერის ძირითად დეტალებზე შეთანხმდნენ. გავლენიანი
ფრანგული გამოცემა Lequipe-ს ინფორმაციით, იურიდიული შეთანხმების გასაფორმებლად კიდევ რამდენიმე დეტალის გავლა მოუწევთ, რომელიც უახლოეს დღეებში საბოლოოდ გადაწყდება.
ამასთან, ხვიჩას „ნაპოლისგან“ პსჟ-ში სამედიცინო შემოწმების გავლაზე ნებართვა ჯერ არ მიუღია, თუმცა ეს მხოლოდ დროის საკითხი იქნება.
Lequipe წერს, რომ დღის განმავლობაში, ხვიჩას აგენტი მამუკა ჯუღელი პსჟ-ს საფეხბურთო მრჩეველს ლუის კამპოსს შეხვდება და მხარეები საბოლოო დეტალებს შეათანხმებენ.
