მანჩესტერ იუნაიტედი საუკეთესო ვარიანტია - არველაძე ხვიჩას ტრანსფერზე
უკანასკნელი 48 საათის მანძილზე ხვიჩა კვარაცხელიას ტრანსფერთან დაკავშირებით წამყვან ევროპულ სპორტულ გამოცემებში ურთიერთგამომრიცხავი ინფორმაციები ვრცელდება. ყველა აღნიშნავს, რომ უახლოეს მომავალში 23 წლის ქართველი ფეხბურთელი „ნაპოლის“ დატოვებს, მაგრამ მისი მომავალი კლუბის შესახებ სხვადასხვა ვარიანტები სახელდება.
სად აჯობებს ხვიჩასთვის კარიერის გაგრძელება, ამის თაობაზე არჩილ არველაძეს საკუთარი მოსაზება აქვს, რომელიც ერთ-ერთი უცხოური ვებ-გვერდის ჟურნალისტს გაუზიარა.
არჩილ არველაძე
პსჟ-ში გადასვლა კვარასთვის ცუდი ნამდვილად არაა, რადგან ეს კლუბი წელს საფრანგეთის ჩემპიონი გახდება და მომდევნო სეზონში ჩემპიონთა ლიგაზე ითამაშებს. მართალია, „ნაპოლიც“ დიდი ალბათობით მოიპოვებს ლიგის საგზურს, მაგრამ ჩემი აზრით, ხვიჩასთვის ახლა საუკეთესო ვარიანტი „მანჩესტერში“ გადაბარგება იქნება და ამის უამრავი მიზეზი არსებობს.
ბოლოს და ბოლოს ინგლისის პრემიერ ლიგასა და მანჩესტერზე ვსაუბრობთ და გარდა ამისა, იუნაიტედს ამჟამად კვარაცხელია ძალიან სჭირდება, რადგან მათ ახლა კრიზისული პერიოდი უდგათ. მართალია, ახალი მთავარი მწვრთნელის ხელმძღვანელობით უკეთესი ხარისხის ფეხბურთს თამაშობენ, მაგრამ შედეგი ჯერ არ ჩანს. კიდევ ერთი მიზეზი კი, რატომაც ხვიჩა „ოლდ ტრაფორდზე“ უნდა წავიდეს, „მანიუში“ ვიქტორ ოსიმენის ტრანსფერის მაღალი ალბათობა და ინგლისური გრანდი თავდასხმაში დიდი ხნის შეთამაშებულ დუეტს მიიღებს“.
„ნაპოლი“ იტალიის სერია A-ს მომდევნო ტურში „სტადიო დიეგო მარადონაზე“ „ვერონას“ უმასპინძლებს და შეიყვანს თუ არა ანტონიო კონტე კვარას სამატჩო განაცხადში, ჯერჯერობით უცნობია.
