პოგბას ახალი თავგადასავალი - ფრანგს ბრაზილიაში ეპატიჟებიან

1 იანვრიდან პოლ პოგბას სავარჯიშო პროცესის განახლების საშუალება მიეცა, თამაშის უფლება კი მარტიდან ექნება. 31 წლის ფრანგი ნახევარმცველი ინდივიდუალური პროგრამით მზადებას შეუდგა საიმისოდ, რათა ორ თვეში ოპტიმალური კონდიციებისგან შორს არ იყოს. ყველაზე კარგი ფრანგი ნახევარმცველისთვის და მისი გარემოცვისთვის კი ის გახლავთ, რომ მსურველები არ აკლია და სავარაუდოდ, უახლოეს მომავალში კონტრაქტს რომელიმე გუნდთან გააფორმებს.

ავტორიტეტული ბრაზილიური გამოცემა Globo-ს ცნობით, „კორინთიანსის“ წარმომადგენლები პოგბასთან უკვე რამდენიმე დღეა მოლაპარაკებებს აწარმოებენ და შეთანხმების მიღწევასთან ახლოს არიან. გასული სეზონი „ტიმაოსთვის“ წარუმატებელი გამოდგა, ბრაზილიის სერია A-ში მეშვიდე ადგილზე გავიდა და ჩემპიონ „ბოტაფოგოს“ 23 ქულით ჩამორჩა. მთავარი მწვრთნელი რამონ დიასი კი სიტუაციის გამოსწორებას სწორედ პოგბასნაირი გამოცდილების მქონე მოთამაშეების დამატებით აპირებს.

ცნობისათვის, გასულ წელს დოპინგის მოხმარებასთან დაკავშირებული ბრალის დამტკიცების გამო, პოლ პოგბას ფეხბურთის თამაში თავდაპირველად 4 წლით აუკრძალეს, თუმცა მოგვიანებით სპორტულმა საარბიტრაჟო სასამართლომ მას სასჯელი 18 თვემდე შეუმცირა.