„კვარა ნაპოლის რეალობას უკვე აღარ შეეფერება“ - იტალიელი ჟურნალისტი

ხვიჩა კვარაცხელიას ნეაპოლური კარიერა შესაძლოა მიმდინარე სეზონის ბოლოს დასრულდეს. ამის შანსები საკმაოდ დიდია. ფეხბურთელსა და კლუბს შორის ამდენი ხნის განმავლობაში ახალ კონტრაქტთან დაკავშირებული უთანხმოება, ამ მოსაზრებას კიდევ უფრო ამყარებს.

იტალიელი ჟურნალისტი მარჩელო ალტამურა, რადიო Napoli Centrale-ზე საუბრისას აცხადებს, რომ - „კვარა აღარ შეეფერება ნეაპოლის რეალობას, ის ფიზიკურ და გონებრივ გვირაბშია“.

„ფლორენციაში ნაპოლის გამარჯვება პასუხი იყო იმაზე, რომ კლუბს აქვს დიდებული ხასიათი. იმის ფონზე, რომ კონტეს ამ შეხვედრაში სამი მნიშვნელოვანი მოთამაშე აკლდა, მაგრამ მაინც ასე დამაჯერებლად მოიგო.

ტრანსფერები? არ ვარ დარწმუნებული, რომ ნაპოლის ახლა ბაზარზე დიდი აქტიურობა სჭირდება. ახალმა ტრანსფერებმა, შესაძლოა გუნდში კონტეს მიერ შექმნილი ბალანსი დააზიანოს.

ინტერი? მათ შესანიშნავი გუნდი ჰყავთ, საუკეთესო. კარგად დაბალანსებული და დაკომპლექტებული, მაგრამ მათი პრობლემა საშუალო ასაკია, რომელიც ძალიან მაღალია. ასეთ დროს, შესაძლოა თავი ფიზიკურმა პრობლემებმა იჩინონ. ასე რომ, ეს სახიფათოა.

კვარაცხელიას საქმე? ის უკვე აღარ შეეფერება ნაპოლის. ფიზიკურ და ფსიქოლოგიურ გვირაბშია შესული. მენტალური პრობლემები აქვს. ის ნაპოლის თვალში ეკალი გახდა. ჩემი აზრით, იგი გუნდში ამჟამად არსებულ სიტუაციას აღარ ერგება. მოედანზე კონცენტრაციის ნაკლებობაც ეტყობა. კლუბმა მის კონტრაქტთან დაკავშირებით არსებულ სიტუაციას თავი ცუდად გაართვა და როგორც ჩანს, ქართველ ფეხბურთელზე ამან იმოქმედა.

კვირას, ნაპოლის ვერონაში მატჩი ელის. არ ვფიქრობ, რომ გუნდს გამარჯვება გაუჭირდეს. ამ შეხვედრაში ნერეშისა და კვარას დუეტს კიდევ ერთხელ ვიხილავთ“.

შეგახსენებთ, რომ ხვიჩა კვარაცხელიას მიმართ ინტერესი „მანჩესტერ იუნაიტედს“, პსჟ-ს, „ბარსელონას“, „ლივერპულსა“ და „მანჩესტერ სიტის“ აქვს. თუმცა, ჯერჯერობით ოფიციალურ შეთავაზებამდე საქმე არ მისულა.