აწყდება პრობლემებს, რასაც მეც ვაწყდებოდი - მაისაშვილი კოკერილზე
ლევან მაისაშვილი წლების განმავლობაში საქართველოს მორაგბეთა ეროვნულ ნაკრებსა და „შავ ლომს“ ხელმძღვანელობდა, ბოლო პერიოდში კი რაგბის კავშირის მაღალი მიღწევების დირექტორის თანამდებობაზე მუშაობს და მისი აზრის მოსმენა როგორც მსოფლიო, ასევე ქართულ რაგბიში მიმდინარე მოვლენებზე ყოველთვის საინტერესოა. მაისაშვილმა რაგბი TV-ისთვის მიცემულ ვრცელ ინტერვიუში 2024 წელს ბორჯღალოსნების გამოსვლა საკმაოდ საინტერესოდ შეაფასა და ყურადღება როგორც დადებით, ასევე უარყოფით მხარეებზე გაამახვილა.
ლევან მაისაშვილი
2024 წელი საკმაოდ საინტერესო სიახლით დავიწყეთ - შევარჩიეთ ეროვნული გუნდის ახალი მთავარი მწვრთნელი, რომლის შერჩევაც იოლი ნამდვილად არ იყო. რატომ? იმიტომ, რომ სპეციფიური ქვეყანა ვართ, სპეციფიური გუნდით, რომელსაც განსაკუთრებული მიდგომა სჭირდება.
ვესაუბრებოდით კანდიდატებს, რომელთა შორისაც ზოგმა იმის გამო თქვა ამ გამოწვევაზე უარი, რომ მუდმივად საქართველოში ცხოვრების პერსპექტივა არ მოეწონა. ზოგი კი თვლიდა, რომ წლის განმავლობაში ჩასატარებელი 11 მატჩიდან ნორმალური სიძლიერის გუნდთან მხოლოდ 2 თამაშის ჩატარება განვითარებისთვის საკმარისი არ იყო.
რიჩარდ კოკერილის მიერ ბოლო ერთი წლის განმავლობაში ჩატარებულ სამუშაოს ერთმნიშვნელოვნად დადებითად შევაფასებდი. მოვიგეთ რაგბი ევროპა და ტრადიციულად უპირობოდ. დიდი გამოწვევა იყო ზაფხულის ტესტ-მატჩები, რადგან სამ სხვადასხვა კლიმატურ სარტყელში სამ განსხვავებულ მეტოქესთან გვიწევდა დაპირისპირება. ამის ფონზე კი შევძელით და ტიერ 1-ის კიდევ ერთი წარმომადგენელი იაპონია დავამარცხეთ. რაც შეეხება ნოემბრის ტესტებს, იტალიასთან ბევრი რამის გამო არ გაგვიმართლა, თორემ გამარჯვება შეგვეძლო.
ბუნებრივია მწვრთნელი შედეგებითა და მოგებებით ფასდება, მაგრამ ეს დრო რიჩარდს ადაპტაციისთვის სჭირდებოდა. გარდა ამისა, ის შემადგენლობის შერჩევა-დაკომპლექტების დროს, აწყდებოდა იგივე სახის პრობლემებს, რასაც მე ვაწყდებოდი. ვგულისხმობ იმ შანტაჟს, რომელსაც საფრანგეთის კლუბები მოთამაშეებს სანაკრებო პაუზების დროს უწყობენ.
შეგახსენებთ, რომ საქართველოს ეროვნული ნაკრები 1 თებერვლიდან რაგბი ევროპის 2025 წლის გათამაშებაში ჩაერთვება, რომელიც 2027 წელს ავსტრალიაში გასამართი მსოფლიოს ჩემპიონატის შესარჩევი ტურნირია.
