ლებრონი ახალ სიმაღლეზე - ჯორდანი უკან მოიტოვა

ლებრონ ჯეიმსმა NBA-ში კიდევ ერთი უნიკალური რეკორდი დაამყარა. „ატლანტასთან“ (119:102) მოგებულ შეხვედრაში „ლეიკერსის“ 40 წლის ლიდერმა მორიგი უმაღლესი დონის შეხვედრა ჩაატარა და 30 ქულით, 8 შედეგიანი პასითა და 3 მოხსნით თანაგუნდელებს შორის საუკეთესო იყო. თუმცა, ეს ყველაფერი არ გახლავთ - „ჰოუქსთან“ მატჩი მის კარიერაში რიგით 563-ეა, რომელშიც მინიმუმ 30 ქულას მოუყარა თავი, რითაც აქამდე ერთპიროვნული რეკორდსმენის, NBA-ს დიდების დარბაზის წევრისა და 6-გზის ჩემპიონის, მაიკლ ჯორდანის მიღწევა გააუმჯობესა.

ფენომენალური ჯეიმსი მართლაც რომ ფენომენალურ ფორმაშია და ბოლო 24 საათში ჩატარებულ ორ შეხვედრაში საერთო ჯამში 66 ქულა დააგროვა, საიდანაც საჯარიმოს ხაზიდან მხოლოდ 4 აიღო, დანარჩენი 62 კი უშუალოდ თამაშიდან ჩააგდო. უკანასკნელ 10 მატჩში ლებრონის საშუალო სტატისტიკური მაჩვენებელი ასეთია - 28,7 ქულა, 6,1 მოხსნა, 8,4 პასი. საშუალო დისტანციიდან მას 55, პერიმეტრიდან - 45, ხოლო საჯარიმოებიდან 83-პროცენტიანი სიზუსტე აქვს.

ძირითადად მისი 40 წლის ლიდერის არაჩვეულებრივ ფორმაში შესვლის ხარჯზე, „ლეიკერსმა“ სატურნირო მდგომარეობა მკვეთრად გაიუმჯობესა და 20 მოგებითა და 14 წაგებით დასავლეთ კონფერენციაში მეოთხე პოზიციას იკავებს.