სანაკრებო ფეხბურთის დრო მოვიდა - ჟოზე სამომავლო გეგმებზე
ჟოზე მოურინიო მედიის წარმომადგენლებთან საკუთარ მომავალზე რაიმეს დაანონსებით არასოდეს გამოირჩეოდა, თუმცა ამჯერად ტრადიცია დაარღვია და ისეთი რამ განაცხადა, რამაც გულშემატკივარს ბევრი სასაუბრო გაუჩინა. მიუხედავად იმისა, რომ პორტუგალიელი სპეციალისტი სულ ახლახანს ჩაუდგა სათავეში, როგორც ჩანს საკლუბო ფეხბურთში დიდხანს დარჩენას აღარ აპირებს და რომელიმე ქვეყნის ეროვნული გუნდის ჩაბარებას გეგმავს.
ჟოზე მოურინიო
მაქვს ძალიან დიდი სურვილი, რომ ჩემი ხელმძღვანელობით რომელიმე ქვეყნის ნაკრებმა ევროპის, ან მსოფლიოს ჩემპიონატზე ითამაშოს. ახალი გამოწვევები ცხოვრებაში მუდამ საჭიროა და როგორცკი „ფენერბაჰჩეში“ იმ მისიას შევასრულებ, რაც კლუბის ხელმძღვანელებმა დამაკისრეს, მაშინვე ახალი თავგადასავლების ძებნას შევუდგები.
ყოველთვის ასე იყო და ასევე დარჩება - მწვრთნელის სიდიადე შედეგებშია და არა სათამაშო ფილოსოფიაში. ჭკვიან ადამიანებს კი მუდამ ყველაზე კარგად სძინავთ, რადგან იციან, როდესაც გაიღვიძებენ, ისევ ინტელექტუალები, დამოუკიდებლები და პრინციპულები იქნებიან.
16 ტურის შემდეგ, ჟოზე მოურინიოს მომზადებული „ფენერბაჰჩე“ თურქეთის ჩემპიონატში 36 ქულით მეორე ადგილზეა და ლიდერ თანაქალაქელ „გალათასარაის“ სოლიდური სხვაობით, 8 ქულით ჩამორჩება.
