„მადლობა, მოგვენატრები“ - კარლსრუეს გულშემატკივრები ბუდუს ემშვიდობებიან

„კარლსრუეს“ გულშემატკივრები თბილი სიტყვებით ემშვიდობებიან საქართველოს ნაკრების ფორვარდს, ბუდუ ზივზივაძეს, რომელიც კარიერას ბუნდესლიგის კლუბ „ჰაიდენჰაიმში“ გააგრძელებს.

Facebook-პოსტზე, რომლითაც „კარლსრუემ“ ბუდუს გაყიდვის შესახებ გამოაცხადა, ქართველი ფორვარდის მისამართით გულშემატკივრებმა არაერთი პოზიტიური კომენტარი დატოვეს და ბუდუს ახალ კლუბში წარმატებები უსურვეს.

„ბუდუს პირველ ბუნდესლიგაში დიდ წარმატებას ვუსურვებ. ბიზნესი ასეა მოწყობილი, ჩვენ ვართ პატარა კლუბი, რომელიც დამოკიდებულია ფეხბურთელების გაყიდვაზე“.

„მადლობა, ბუდუ! მოგვენატრები როგორც მოედანზე, ასევე ჩვენს გულებში“.

„წარმატებები და ჯანმრთელობა ბუდუს! ის დაგვეხმარა, ჩვენ კი მივეცით შესაძლებლობა, თავისი საუკეთესო ფორმა დაებრუნებინა. ორივე მხარისთვის ეს კარგი ტრანსფერი იყო. ყველა, ვინც ბუდუს გაყიდვის გამო კლუბის მენეჯმენტს აკრიტიკებს, უბრალოდ ვერ ერკვევა საფეხბურთო ბიზნესის მუშაობაში“.

„მადლობა, ბუდუ, და წარმატებები „ჰაიდენჰაიმში“. იმედია, მას ახალ კლუბში შანსები მიეცემა“

„მეგონა, კლუბს კომპეტენტური მენეჯმენტი ჰყავდა, მაგრამ ეს კატასტროფული გადაწყვეტილებაა. პირველად ამდენი წლის განმავლობაში გულშემატკივრებს პირველ ბუნდესლიგაში დაწინაურების იმედი აქვთ, კლუბი კი ასეთ ნაბიჯს დგამს, რაც იმას ნიშნავს, რომ მათ გუნდის არ სჯერათ და ურჩევნიათ, ფული მიიღონ და ჩაკლან ეიფორია, რომელიც გულშემატკივრებს სეზონის დარჩენილ ნაწილთან დაკავშირებით ჰქონდათ. ამ სეზონში „კარლსრუეს“ არც ერთ თამაშს აღარ ვუყურებ“.

შეგახსენებთ, რომ საქართველოს ნაკრების ფეხბურთელი, ბუდუ ზივზივაძე კარიერას „ჰაიდენჰაიმში“ განაგრძობს. გერმანულმა კლუბმა ტრანსფერი ოფიციალურად დაადასტურა და ზივზივაძემ „ჰაიდენჰაიმს“ საკუთარი მომავალი 2029 წლამდე დაუკავშირა.

მიმდინარე სეზონში „კარლსრუეს'' რიგებში ბუდუმ ბუნდესლიგა 2-ის 17 მატჩში 12 გოლი გაიტანა და ბომბარდირთა დავაში მეორე ადგილზეა. 2023 წლის ნოემბრიდან მოყოლებული „კარლსრუეში'' სტაბილურად შედეგიანი იყო და მისი ტრანსფერი მოულოდნელი არ ყოფილა.