„ჩემი საქმე არაა, კლუბს ვენდობი“ - ფლიკი ოლმოს და ვიქტორის რეგისტრაციაზე
„ბარსელონას“ მთავარმა მწვრთნელმა, ჰანსი ფლიკმა „ბლაუგრანას“ ორი შემტევის, დანი ოლმოსა და პაუ ვიქტორის დარეგისტრირებასთან დაკავშირებით შექმნილ პრობლემებზე ისაუბრა.
ჰანსი ფლიკი:
„ამაზე საუბარი არ მსურს, ეს ჩემი საქმე არაა. ჩემი ამოცანაა, გუნდი სათასო შეხვედრისთვის მოვამზადო. ვესაუბრე პრეზიდენტს, კლუბს ყველაფერში ვენდობი. ყველა თავის საქმეს აკეთებს, ჩემი საქმე კი გუნდის მომზადებაა.
მართალი გითხრათ, დანი ოლმოსა და პაუ ვიქტორის ირგვლივ შექმნილი ვითარება არ მახარებს, მაგრამ ჩვენ პროფესიონალები ვართ: მათ უნდა ივარჯიშონ, მე კი ისინი უნდა გავწვრთნა. ჩვენ კლუბის გვჯერა. მე ყოველთვის პოზიტიურად ვარ განწყობილი. უნდა დაველოდოთ და ვნახოთ, როგორი გადაწყვეტილება იქნება მიღებული“.
შეგახსენებთ, რომ სეზონის მეორე ნაწილისთვის პაუ ვიქტორისა და დანი ოლმოს დარეგისტრირების ვადები 31 დეკემბერს ამოიწურა, თუმცა „ბარსელონამ“ სასამართლოს მიმართა და დარეგისტრირების ბოლო ვადის სატრანსფერო ფანჯრის დახურვამდე გადადება მოითხოვა.
ამასთანავე, ოლმოსა და ვიქტორის კონტრაქტების მიხედვით, ორივე ფეხბურთელს სატრანსფერო ფანჯრის დახურვამდე 24 საათით ადრე თავისუფალი აგენტის სტატუსით კლუბის დატოვება შეუძლიათ, თუმცა ასეთ შემთხვევაში ისინი კონტრაქტით გათვალისწინებულ სრულ ხელფასს ვერ მიიღებენ. ესპანური მედიის ინფორმაციით, არც ოლმო და არც ვიქტორი ასეთ ვარიანტს არ განიხილავენ და „ბარსელონაში“ დარჩენა სურთ.
აღსანიშნავია ისიც, რომ თუ ფეხბურთელები შიდა ჩემპიონატზე ვერ დარეგისტრირდებიან, „ბარსელონა“ მათ გამოყენებას ვერც ჩემპიონთა ლიგაზე შეძლებს.
