Sky Sport: არც კვარა, არც ნერეში - კონტე ფიორენტინასთან სიურპრიზს გეგმავს

4 იანვარს, „ნაპოლი“ 2025 წლის პირველ შეხვედრას გამართავს. სერია A-ს მე-19 ტურში ანტონიო კონტეს გუნდი ფლორენციაში „ფიორენტინას“ დაუპირისპირდება. ამ მატჩთან დაკავშირებით იტალიური პრესა საინტერესო ინფორმაციას ავრცელებს.

ბოლო დროს აქტუალური თემაა, თუ როგორ არჩევანს გააკეთებს კონტე და გარემარბების ტრიოდან - პოლიტანო, კვარაცხელია, ნერეში - რომელ დუეტს დააყენებს სასტარტოში. Sky Sport-ი მოულოდნელ ინფორმაციას ავრცელებს და წერს, რომ დუეტი არ შედგება და ტრიოს 2 წევრი სკამზე დარჩება. კონკრეტულად კი კვარა და ნერეში.

„ბოლო ვარჯიშებზე პოლიტანოს პრობლემები შეექმნა. ფლორენციაში მისი თამაში საეჭვოა. კონტემ ამ მოვლენების ფონზე ახალი გამოსავალი იპოვა და შემტევ ტრიოს შეცვლის. სპინაცოლა შეტევაში აიწევს, მარჯვენა ფლანგიდან ნერეში შეუტევს, ფორვარდი კი ლუკაკუ იქნება. კვარაცხელია თადარიგში დარჩება და ის საჭიროების შემთხვევაში შეტევის გაძლიერების მთავარი ოფცია გახდება.

პოლიტანოს კუნთის ტრავმა აქვს და როგორც ჩანს, კონტემ ახალი გადაწყვეტილებები მიიღო“.

მოგვიანებით გამართულ წინასამატჩო პრესკონფერენციაზე, ანტონიო კონტემ განაცხადა, რომ პოლიტანოსაც და ხვიჩასაც მცირე დაზიანებები აქვთ და „ფიორენტინასთან" მატჩს ორივე მათგანი გამოტოვებს.

„იქნება თუ არა პოლიტანო? არა, ბოლო ერთი კვირაა ბევრი შეფერხებები გვაქვს. ასევე გვაკლია კვარაცხელია, რომელსაც მუხლის ტრავმა ჯერ ბოლომდე არ მოუშუშებია. მაწუხებს თუ არა ყოველივე ეს? ტრავმები ფეხბურთის განუყოფელი ნაწილია. მსგავსი შემთხვევები გვქონდა ლობოტკასთან და გილმორთან მიმართებითაც, ახლა კი ბონჯორნოს და კვარას სჭირდება დასვენება. ვეცდებით არსებული დანაკლისი გუნდური მუშაობით გამოვასწოროთ".

კონტეს გუნდს ვინჩენცო იტალიანოს „ფიორენტინასთან" რთული გასვლა ელის. ფლორენციელები ამ სეზონში დამაჯერებლად გამოიყურებიან და ამჟამად 17 შეხვედრის შემდეგ 32 ქულა აქვთ. „პარტენოპეიზე" ერთი მატჩით ნაკლები აქვთ გამართული და შაბათს გამარჯვების შემთხვევაში მათთან ჩამორჩენას პოტენციურად 3 ქულამდე შეამცირებენ.