„ბნელი ენერგია აქვს, მსგავსი რამ არასდროს მიგრძვნია“ - თოფურია კონორზე

UFC-ის ქვემსუბუქი წონითი დივიზიონის ჩემპიონმა, ილია თოფურიამ Glamtera Visuals-თან ინტერვიუს დროს კონორ მაკგრეგორზე ისაუბრა და განაცხადა, რომ მასთან ერთად რვაკუთხედში არასდროს შევა.

რას ამბობს „მატადორი“:

„მას საშინელი ენერგია აქვს. ვფიცავ, ვგრძნობდი, რომ მას რაღაც ჯოჯოხეთური აურა ჰქონდა. უბრალოდ, მინდა, რომ ამ ბიჭისგან თავი შორს დავიჭირო, მას ბნელი ენერგია აქვს. პირადად მე, მსგავსი რამ არასდროს მიგრძვნია“.

შეგახსენებთ, რომ ილია თოფურია UFC-ის ქვემსუბუქი წონითი დივიზიონის ჩემპიონი 2024 წლის თებერვალში გახდა, როდესაც მან ამ წონის ყველა დროის ერთ-ერთი გამორჩეული მებრძოლი, ალექსანდრ ვოლკანოვსკი ნოკაუტით დაამარცხა, შემდეგ კი ოქტომბერში, ჩემპიონის ქამარი კიდევ ერთი გამორჩეული მებრძოლის, მაქს ჰოლოუეის დანოკაუტების შემდეგ დაიცვა. 

ჯერჯერობით, უცნობია, თუ ვინ იქნება „მატადორის“ მომდევნო მეტოქე. ჰოლოუეისთან გამარჯვების შემდეგ თოფურიამ ალექსანდრ ვოლკანოვსკისთან რემატჩზე მზადყოფნა გამოთქვა, თუმცა, მოგვიანებით ქართველი მებრძოლის გუნდმა განაცხადა, რომ თოფურია წონის შეცვლას და მსუბუქ წონაში ასვლას განიხილავს, სადაც ჩემპიონი ისლამ მახაჩევია.