საუკეთესო დეკემბერში - მბაპე ფორმაში შედის

კლუბის გულშემატკივრებს შორის ჩატარებული გამოკითხვის შედეგად, „რეალის“ დეკემბრის თვის საუკეთესო ფეხბურთელად კილიან მბაპე დასახელდა. 26 წლის ფრანგი ფეხბურთელისთვის ეს პატარა პრიზი მის მდიდარ კარიერაში ბევრი არაფრით არის გამორჩეული, მაგრამ იმ პრობლემების ფონზე, რომელიც მას უკანასკნელ პერიოდში ჰქონდა, ბუნებრივია ქომაგების მხრიდან ასეთი აღიარება პოზიტიური მოვლენა უნდა იყოს.

მბაპემ მის თანაგუნდელებსა და ამ გამოკითხვაში მთავარ კონკურენტებს, ჯუდ ბელინგემს, ფედერიკო ვალვერდეს, ანტონიო რუდიგერსა და როდრიგო გოეშს სოლიდური უპირატესობით აჯობა. გასულ თვეში სამეფო კლუბის შემადგენლობაში ყველა ტურნირზე ჩატარებულ 6 შეხვედრაში კილიანმა თავი 5 გოლითა და 2 საგოლე პასით გამოიჩინა. მთლიანობაში კი ანგარიშზე წლევანდელ სეზონში 22 მატჩში 12 გოლი და 3 საგოლე პასია.

18 ტურში დაგროვებული 40 ქულით მადრიდის „რეალი“ ესპანეთის ლა ლიგის სატურნირო ცხრილში მეორე ადგილზეა და ლიდერ თანაქალაქელ „ატლეტიკოს“ ქულით ჩამორჩება. 2025 წელს „ბლანკოსი“ 3 იანვარს სტუმრად გიორგი მამარდაშვილის „ვალენსიასთან“ თამაშით დაიწყებს.