„კვარა მოთხილამურეს ჰგავს, რომელიც...“ - ფედელემ ხვიჩას და ნერეშის კონკურენციაზე ისაუბრა
ცნობილმა იტალიელმა საფეხბურთო მენეჯერმა და ძმები კანავაროების ყოფილმა აგენტმა, ენრიკო ფედელემ იტალიურ მედიასთან ინტერვიუს დროს ხვიჩა კვარაცხელიასა და დავიდ ნერეშის კონკურენციაზე ისაუბრა და „ნაპოლი“-„ვენეციას“ მატჩი შეაფასა.
რას ამბობს ფედელე:
„ნერეშს განსაკუთრებული მატჩი არ ჰქონია. პირველ ნახევარში მეტოქის საჯარიმოში ბურთი მხოლოდ ერთხელ ჩააგდო და ბურთი ექვსჯერ დაკარგა. ის ყოველთვის ერთსა და იმავეს აკეთებს. გოლის ეპიზოდში ასისტი? მისი პასი მცველებს მოხვდა, ცუდად ჩაჭრეს და ამის შემდეგ, ასხლეტილი ბურთი მიუვიდა რასპადორის. ეს შემთხვევითი იყო“.
„არ ვამბობ, რომ ნერეში ცუდი ფეხბურთელია, ის შესანიშნავი მოთამაშეა, რომელსაც დაცვის გარღვევა და თამაშზე გავლენის მოხდენა შეუძლია, მაგრამ კვარა საერთოდ სხვა დონეზეა და ამას იგნორირებას ვერც „ნაპოლი“ უკეთებს. მართალია, დღეს შესაძლოა ცოტა არაზუსტია და ბევრ მომენტს ვერ იყენებს, მაგრამ ის მაინც სასტარტოს ფეხბურთელია. ინდივიდუალურად ბევრი იტყვის, რომ დღეს ნერეში უკეთესია, მაგრამ ეს ასე არ არის. ფეხბურთი ასე არ ფასდება“.
„კვარა ზედმეტად ჰგავს მოთხილამურეს, რომელიც ჰორიზონტალურ ცრუ მოძრაობებს აკეთებს და შორიდან იწყებს დრიბლინგს, მაგრამ ქართველი ფლანგზე გაცილებით პროდუქტიულია, ვიდრე ნერეში. გუშინ ნერეშმა მხოლოდ ერთხელ გაამწვავა, ქართველი კი მუდამ ყურადღების ცენტრში იყო. პატარა შეცდომაზეც არასრულყოფილს ეძახით. როდესაც კვარაზე ვსაუბრობთ, ის სლალომისტია, ნერეში კი დაღმართის მოთხილამურე“.
მუხლის ტრავმის მოშუშების შემდეგ, ხვიჩა ნეაპოლური გუნდის სასტარტო შემადგენლობაში პირველად გამოჩნდა და მოედანზე 75 წუთი გაატარა. ამ დროის განმავლობაში ხვიჩა აქტიურობდა და გოლის გატანის რამდენიმე შანსიც ჰქონდა, მაგრამ სამწუხაროდ, მოედანი შედეგიანი მოქმედების გარეშე დატოვა.
ქართველი შემტევი ბურთს 60-ჯერ შეეხო, 33-დან 30 ზუსტი პასი გააკეთა, აქედან 3 კი საკვანძო იყო. კარისკენ 6-ჯერ დაარტყა - 3-ჯერ ზუსტად, 2-ჯერ არაზუსტად, 1 დარტყმაც კი დაიბლოკა. 4 დრიბლინგის მცდელობიდან 1 ზუსტი ჰქონდა, საშუალოდ, 0.20 საგოლე ეპიზოდი შექმნა, 9-დან 5 პოზიციური დუელი მოიგო, 3-დან 2 საჰაერო დუელში გამოვიდა გამარჯვებული. მის წინააღმდეგ 2-ჯერ დაჯარიმდნენ და ორივეჯერ მსაჯმა „ვენეციას“ ფეხბურთელს ყვითელი ბარათი უჩვენა. ასევე, ჰქონდა 2 ართმევაც. ცნობილმა ანალიტიკურმა პორტალმა Sofascore-მა მისი თამაში 8.0 ქულით შეაფასა, რაც „ნაპოლიში“ ყველაზე მაღალი მაჩვენებელი იყო.
ქართველმა შემტევმა მიმდინარე სეზონში „ნაპოლის“ მაისურით მე-17 მატჩი ჩაატარა და თავი 5 გოლითა და 3 საგოლე გადაცემით გამოიჩინა.
„ნაპოლიმ“ ამ გამარჯვებით 41 ქულა დააგროვა სერია A-ს სატურნირო ცხრილში „ატალანტას“ გაუთანაბრდა, რითაც ბერგამოელებთან ერთად გათამაშების ერთ-ერთი ლიდერი გახდა. ანტონიო კონტეს გუნდი მომდევნო შეხვედრას 4 იანვარს, სტუმრად „ფიორენტინასთან“ გამართავს.
