„იცოდა, რომ ცოლი მომყავდა“ | მარტინ კიოუნის ამბავი ფერგიზე

ინგლისის ნაკრების ყოფილმა ფეხბურთელმა, მარტინ კიოუნმა საინტერესო ისტორია გაიხსენა, რომელიც „მანჩესტერ იუნაიტედის“ ლეგენდარულ მთავარ მწვრთნელს, სერ ალექს ფერგიუსონს უკავშირდება. „ასტონ ვილას“ დატოვების შემდეგ, კიოუნის გადაბირება რამდენიმე კლუბს უნდოდა და ერთ-ერთი „მანჩესტერ იუნაიტედი“ იყო, მაგრამ „ფერგიმ“ ინგლისელს თავად ურჩია, „ევერტონში“ წასულიყო.

„ასტონ ვილასთან ახალი ხელშეკრულება ვერ გავაფორმე. ცოლი მომყავდა და მომავლის დალაგება მჭირდებოდა. გრემ ტეილორი სამომავლო გეგმებსა და ახალი ფეხბურთელების მოყვანაზე არაფერს ამბობდა, რის გამოც, სხვა კლუბებთან დავიწყე ლაპარაკი.

ევერტონი ერთ-ერთი იყო, ვისაც ჩემი გადაბირება სურდა, ბრაიან კლაფი კი ცდილობდა, ნოტინგემში გადავეყვანე. ფერგიმ ოლდ ტრაფორდი დამათვალიერებინა, მაგრამ მანჩესტერმა ევერტონზე ორჯერ ნაკლები ხელფასი შემომთავაზა. სიმართლე გითხრათ, სერ ალექსმა იცოდა, რომ ცოლი მომყავდა და მირჩია, ოჯახზე მეფიქრა და უკეთესი ხელფასი ამერჩია“.

ცნობისთვის, კიოუნს ინგლისის ნაკრებში 43 შეხვედრა აქვს ჩატარებული. კარიერის დიდი ნაწილი მან „არსენალში“ გაატარა და „მეთოფეების“ ღირსებას 1993-დან 2004 წლამდე იცავდა.