AS: ალექსანდერ-არნოლდი ცალი ფეხით რეალშია
მადრიდის რეალი მარჯვენა მცველის ძიებაშია. სამეფო კლუბის მთავარი კანდიდატი ტრენტ ალექსანდრ-არნოლდია.
ამ საკითხთან დაკავშირებით, ესპანური გამოცემა AS ახალ ინფორმაციას გვთავაზობს. ვიგებთ, რომ შეთანხმება თითქმის მიღწეულია. ტრენტი ლივერპულის შეთავაზებას კონტრაქტის გახანგრძლივებასთან დაკავშირებით უგულებელყოფს და ბერნაბეუზე წასვლა სურს. მადრიდული გრანდი ინგლისელის იანვარში შეძენას გეგმავს.
AS წერს, რომ ყველაფერი 90%-ით დასრულებულია. არნოლდი ბელინგემის ახლო მეგობარია და ის ცალი ფეხით რეალშია. ოპტიმიზმი საკმაოდ მაღალია.
ბოლო რამდენიმე კვირაში, ტრანსფერის განხორციელება დაჩქარდა, რადგან უცნობია როდის და როგორ ფორმაში დაბრუნდება დანი კარვახალი. ლუკას ვასკესი მნიშვნელოვან მატჩებში მარჯვენა მცველის პოზიციაზე მაღალ დონეზე ვერ თამაშობს. ამ ყველაფერმა კი ფლორენტინო პერესს აქტიურობისკენ უბიძგა.
AS იმასაც გვამცნობს, რომ მადრიდის რეალმა ლივერპულის ხელმძღვანელობას არ დაუმალა, რომ ტრენტთან მოლაპარაკებას აწარმოებს. გუნდებს შორის შესანიშნავი ურთიერთობა არსებობს და პრობლემა არაფერზე შექმნილა. თავის მხრივ, მერსისაიდულ გრანდს საკუთარი ფეხბურთელის დარჩენაში დარწმუნება სურს, მაგრამ არაფერი გამოსდის.
პირველი იანვარი საკვანძო თარიღია, რადგან იქამდე ოფიციალური ხელმოწერა არ შეიძლება. არსებობს გარემოება, რომლის მიხედვითაც ტრენტი არა იანვარში, არამედ ზაფხულში გადავა რეალში. ამის მიზეზი მიმდინარე სეზონში შესაძლო წარმატებებია. არნოლდი ლივერპულში დაიბადა და ამ გუნდის ერთგულია.
შუა სეზონში სხვა გუნდში გადასვლა კი ღალატის ტოლფასი იქნება. საბოლოოდ, ვიღებთ სიტუაციას, რომელშიც შეიძლება მოვლენები შემდეგნაირად განვითარდეს - თუ ყველაფერი გეგმის მიხედვით წავა, ტრენტის ტრანსფერი იანვარში გამოცხადდება და მადრიდულ გრანდს ზაფხულის სატრანსფერო ფანჯრის დროს შეუერთდება.
შეგახსენებთ, რომ ინგლისელი ფეხბურთელი ლივერპულის აღზრდილი გახლავთ. პირველ გუნდში კი 2016 წლიდან თამაშობს. დღემდე ყველა ტურნირზე ერთად 332 მატჩში მიიღო მონაწილეობა, 19 გოლი გაიტანა და 85 საგოლე გადაცემა შეასრულა.
