იტალიელი ჟურნალისტი: „მილანმა ემპოლიდან გოგლიჩიძე უნდა წაიყვანოს“

იტალიელი ჟურნალისტი და Sky Sport-ის კომენტატორი ფაბიო კარესა მოუწოდებს „მილანს“ ბრაზილიელი განაპირა მცველის, ემერსონ როიალის გაყიდვას და მის ნაცვლად „ემპოლის“ ქართველი მცველის, საბა გოგლიჩიძის დამატებას სთავაზობს.

რას ამბობს ფაბიო კარესა:

„ალექს ხიმენესს (2005 წელს დაბადებული მცველი, რომელიც მილანმა „რეალიდან“ დაიმატა) ორივე ფლანგზე თამაში შეუძლია, ამიტომ „მილანს“ შევთავაზებდი, გაეყიდა ემერსონ როიალი და ტეო ერნანდესი, „ემპოლიდან“ კი საბა გოგლიჩიძე წამოეყვანა. ის ბოლო პერიოდის ერთ-ერთი საინტერესო ფეხბურთელია, გოგლიჩიძემ და ხიმენესმა „მილანში“ დაცვის ფლანგები უნდა ჩაიბარონ“.

თავის მხრივ, გამოცემა SpazioMilan-ი კარესას ამ განცხადებებს ეხმაურება და აღნიშნავს, რომ „მილანმა“ არავითარ შემთხვევაში არ უნდა გაყიდოს ერნანდესი, მეტიც, „როსონერიმ“ მასთან კონტრაქტი უნდა გაახანგრძლივოს. რაც შეეხება გოგლიჩიძეს, SpazioMilan-ის გათვლებით, მისი შეძენა მილანელებს დაახლოებით 10 მილიონი ევრო დაუჯდებათ.

ცნობისთვის, გოგლიჩიძემ „ემპოლის“ ძირითად შემადგენლობაში ადგილი დაიმკვიდრა და სერია-ს მიმდინარე სეზონში მის ანგარიშზე უკვე 15 მატჩია.